-
O extremo espera un partido aberto e lograr algún gol no Helmántico
Santiago de Compostela, a 13 de Xuño de 2018.
Rubén Martínez xogou o domingo pasado un dos mellores partidos da súa vida. O extremo entrou no once a última hora, pero tivo un gran rendemento na hora na que estivo no campo, por iso é polo que a mércores sigue cun sorriso de orella a orella.
“Gustoume entrar doutra maneira, porque non é de gusto saír por un compañeiro lesionado e máis sendo Róber, que é tan importante para o equipo, pero tiven a oportunidade e sabía que tiña que aproveitala, dino todo, e creo que o fixen ben”, explicou Rubén.
Ademais do gran partido, o extremo aínda non se cre o que viviron en San Lázaro. “Nin nos soños podía estar na miña cabeza o que vivimos, o ambiente, o recibimento e a alegría do final, foi algo novo para min e encantoume”, sinalou.
Con todo, tras dous días de descanso e aínda que hoxe parou por precaución, o equipo xa ten en mente o partido do domingo. Así, Yago Iglesias xa lles deu as primeiras instrucións para esta nova eliminatoria. Rubén destacou da mensaxe do técnico que teñan tranquilidade, que só pensen no domingo e que tenten sacar un bo resultado.
Malia que aínda non recibiron ningunha sesión de vídeo, cada xogador fixo as súas pescudas pola súa conta e a conclusión á que chega Rubén é que son “un equipo moi perigoso, que no seu campo mete moita xente, capaces de non perderlle nunca a cara ao partido, metendo sempre goles”. Ademais, engadiu que arriba teñen xogadores moi rápidos e perigosos, con xente de superior categoría. “Quedou cuarto, pero eliminou a un primeiro, polo que será duro”, sentenciou Rubén.
Por esta razón, o xogador cre que se decidirá todo nos pequenos detalles e que deben aprender da viaxe a Terrassa. “Esperamos un partido aberto, o que é mellor para nós, no que debemos tentar lograr algún gol e se podemos alcanzar a vitoria, mellor que mellor”, argumentou.
Para lograla, o equipo espera contar co maior apoio posible na bancada, co que se alegran de que sexa un desprazamento próximo. “Esperamos darlles unha alegría igual que o domingo”, dixo.
Por último, no plano persoal, Rubén dará o máximo no que lle toque xogar. “Estou para o que diga o míster, darei todo o intre que me poña, porque agora mesmo estamos todos ao 100 % e salga quen salga facémolo todos ben”, concluíu.
