-
O central agarda moita afección do Compos no Helmántico
Santiago de Compostela, a 14 de Xuño de 2018.
Curtido en equipos de Castela e León e do resto de España, David Uña é un dos xogadores da SD Compostela que máis futbolistas coñece do CF Salmantino UDS. Non coincidiu con ningún, pero si algúns dos seus compañeiros e tamén se enfrontou a varios.
O central madrileño, como voz máis que autorizada, pasou revista esta mañá á eliminatoria que comezará este domingo ás 12.00 horas no Estadio Helmántico. Valorou como chega o equipo tras o subidón do outro día e analizou ao próximo rival.
“Xa pasou a euforia tras dous días de descanso, polo que temos que pensar xa no domingo. Non conseguimos nada aínda, falta o premio gordo, como di Yago”, comentou Uña.
Aínda así, o central lembrou que o vivido en San Lázaro contra o Terrassa FC foi inesquecible, algo que nunca vivira. “Despois do recibimento, cando entramos ao vestiario, mirámonos e dixemos imos xa 1-0, temos que lograr a remontada. No partido, tamén se deu todo perfecto, marcando en momentos ideais e sabendo defender cando nos tocou”, detallou un xogador que volveu á titularidade neste encontro.
Precisamente, do seu papel no equipo, Uña explicou que esperará ao domingo para saber o que diga o técnico, pero toque o que toque, achegará o máximo. “Son un home de equipo, se me saca 5 ou 90, ou mesmo non xogo, vou dar o 100 % e axudar no máximo que poida aos meus compañeiros, porque salga quen salga farao de dez”, expresou demostrando a súa gran humildade e engadiu: “Durante a tempada fomos rotando os centrais, pero no playoff confiou en Carde e Casas, o que é normal porque o están facendo moi ben. A min tócame traballar para complicarlle as cousas ao míster”.
Sexa xogando ou non, Uña está contento co rival que lles tocou, non pola súa dificultade, senón polo desprazamento. “É o rival máis próximo que nos podía tocar. Espero moita afección o domingo do Compos no Helmántico, igual que virán despois moita xente deles, polo que será unha eliminatoria que todo o mundo quere xogar”, confesou.
Con todo, o central advertiu que “non é un cuarto calquera, vén de eliminar a un segundo e a un primeiro e hai que ter moito coidado con el”. Nas súas primeiras procuras, Uña sacou a conclusión de que son “un equipo con xente arriba por banda moi rápida e dous dianteiros, como Murci e Órtiz, doutra categoría e que nos farán sufrir moito”.
Por esta razón, para lograr o ansiado ascenso, Uña cre que é vital “sacar un bo resultado na ida, marcando algún gol, para logo sentenciar a eliminatoria en San Lázaro”, concluíu.
