-
O equipo santiagués seguirá como filial do equipo branquiazul un curso máis
Santiago de Compostela, a 4 de Xullo de 2018.
O Zona Vella CF, do grupo 5 da Segunda Nacional, seguirá sendo o filial da SD Compostela durante a tempada 18/19, despois de renovar, por un ano máis, o convenio que vincula a ambas entidades desde o curso pasado.
A directiva do conxunto santiagués de Segunda está a traballar intensamente, coa colaboración de Manuel Castiñeiras, Víctor Pazos e Iván Carril na confección do plantel para a próxima campaña, na que tentarán conseguir o ascenso de categoría.
Con este convenio, o Zona Vella participa activamente no proxecto social da SD Compostela, no que servirá de trampolín para aqueles xogadores que terminaron a súa traxectoria nos xuvenís branquiazuis e dan o salto á categoría sénior. Axudará de formación para que os futbolistas sigan vinculados á nosa entidade e poidan ser requiridos por Yago Iglesias para o primeiro equipo nun futuro.
Ademais, grazas a esta unión, o Compos demostra o seu compromiso coa cidade, ligando a varios dos seus equipos, un lazo do que se esperan sacar grandes resultados. Tamén permite que as cores branquiazuis luzan no emblemático campo de Santa Isabel, un estadio que tantas alegrías deunos en épocas pasadas.
