-
Firma por un ano e competirá con Anxo Pérez pola titularidade
Santiago de Compostela, a 4 de Xullo de 2018.
Lorenzo Riveiro Oliveira será o porteiro da SD Compostela unha tempada máis. O meta de Padrón repetirá baixo os paus do Estadio de San Lázaro despois de renovar a súa vinculación coa entidade branquiazul por un curso máis.
Con este novo contrato, o porteiro cumprirá o seu segundo ano e medio defendendo a elástica compostelanista, na súa segunda etapa na capital galega. Tras compartir vestiario con Lucas Díaz, esta próxima campaña, Lorenzo competirá pola titularidade con Anxo Pérez, nova fichaxe da entidade para o proxecto.
Nesta última campaña, o meta disputou un total de dez partidos, todos eles como titular, nos que encaixou só oito goles. As súas grandes actuacións permitiron que o equipo queda coa porta a cero en cinco ocasiones, destacando o encontro en As Eiroas, contra o Bergantiños FC, ou no Carballiño, contra o CD Arenteiro, no partido no que o Compos celebrou o título de liga.
No curso anterior, Lorenzo chegou a Santiago no mercado invernal, procedente do Alondras, malia que contou con escaso protagonismo, xa que só disputou as tres últimas xornadas de liga, nas que o equipo logrou dous triunfos.
Anteriormente, tamén xogara na SD Compostela na tempada 2013/14, na que o club militou na Segunda B.
Aos seus 27 anos, o gardameta destaca polo seu gran xogo de pés, as súas calidades baixo os paus e unha gran capacidade para deter penaltis.
Coa súa renovación, xa son once os xogadores que asinaron a súa continuidade para a próxima campaña e, ao mesmo tempo, o club pecha a portería para este ano no que tentará que a súa peregrinación acabe co soño do ascenso.
