-
Aythami, Mon e Miki foron os goleadores branquiazuis no Cepelo
Santiago de Compostela, a 12 de Agosto de 2018.
Penúltimo trámite superado e a SD Compostela xa está na ansiada final da XXX Copa Deputación da Coruña. Esta tarde, no Campo do Cepelo, superou á SD Negreira por 0-3 nun partido no que foi moi superior ao rival que tiña enfronte.
Nun campo pequeno, de herba artificial, o Compos fíxose co dominio a base de oficio desde o primeiro minuto. Fixo valer a superior categoría e rapidamente adiantaríase no marcador. Corría o minuto 19 cando Mon colgou o balón á área e Aythami, adiantándose a todos os defensas, rematou de cabeza ao fondo das mallas no seu primeiro tanto da pretempada.
Antes do tempo de descanso, os branquiazuis tiveron a oportunidade de ampliar a vantaxe, pero primeiro Mon, despois Aythami e por último Brais Abelenda non foron capaces de superar a un atento Jose.
Con todo, á volta dos vestiarios, o decorado púxose máis favorable en canto o Compos aproveitou a súa opción. Nun balón rebotado, Mon enganchou unha gran e potente volea desde dentro da área coa súa perna esquerda coa que superou ao porteiro local. O tanto do capitán, o primeiro dun dos xogadores que segue do curso pasado, serviu para acougar os ánimos e achegarse un paso máis á final soñada.
Xa na recta final, e tras varios achegamentos, Miki poñía a guinda ao pastel co seu cuarto gol da pretempada. O extremo de Nigrán, que segue en refacho, aproveitou un balón longo para superar a Jose cun bo golpeo ao segundo pau.
Co 0-3, o árbitro sinalou o final do encontro e a SD Compostela clasificábase para a final da XXX Copa Deputación da Coruña na que se medirá ao Racing de Ferrol. O duelo agardado será o vindeiro martes ás 20.00 horas no Municipal do Roxo.
FICHA TÉCNICA:
0- SD Negreira: Jose; Juan Diego, Pereira, Santalo, Paco; Miguel, Pereira (M.Iglesias, m.46), Alberto; Richi (Anxo, m.74), Uxío e Rial (Samuel, m.56).
3- SD Compostela: Anxo Pérez; Saro, Álvaro Casas, David Uña, Naveira; Ube, Mon; Brais Abelenda, Santi (Samu, m.76), Rubén (Sergio Pereira, m.59); e Aythami (Miki, m.50).
Goles: 0-1: Aythami, min.19; 0-2: Mon, min.64; 0-3: Miki, min.92.
Árbitro: Elespe Tireux, colexio santiagués. Amoestou a Ube.
Incidencias: Partido das Semifinais da XXX Copa Deputación da Coruña disputado no Campo de O Cepelo ante 400 espectadores.
