-
Os tres foron presentados esta mañá na tenda 4-4-2 Botas de Área Central
Santiago de Compostela, a 17 de agosto de 2018.
Samu Rodríguez, Rubén Martínez e Álex Ares decidiron este verán manter o seu compromiso coa SD Compostela para alcanzar ese soño que se lles escapou ao final de todo. Os tres foron grandes protagonistas durante a tempada para o adestrador e este curso buscarán seguir nesa liña.
Para iso, a pretempada está a servir para coller a forma e tamén para mostrar as primeiras boas impresións como na Copa Deputación. Tralo título, os tres futbolistas branquiazuis foron presentados na tenda de 4-4-2 Botas de Área Central, que seguirá apoiando ao club este ano.
O primeiro en falar foi Samu, quen asegurou que o triunfo no torneo estival serviulles para “seguir co refacho que viñamos de pretempada e esperamos empezar a tempada igual”, comentou. O obxectivo, di un dos capitáns, é “tentar entrar no playoff e lograr o que se escapou o ano pasado por iso temos unha gran ilusión”, confesa.
Esas boas impresións tamén as subscribe un Rubén Martínez que terá que ser paciente para lidar coa lesión que sufriu o domingo pasado. “Non sei canto tempo estarei sen xogar, pero espero que sexa o menos posible para axudar ao equipo”, explica.
No grupal, asegura que o equipo está a traballar moito para que as cousas saian ben e as sensacións “son moi boas para repetir o da tempada pasada”.
Por último, Álex Ares, malia que apuntou que hai que ter calma polo triunfo na Copa, si argumenta que esta “serviu para adestrar máis, axustarse aos compañeiros e coller boas sensacións”.
Con moita ilusión polo comezo ligueiro, advirte que a liga estará moi igualada. “Hai moi bos equipos e o grupo xa é igualado sempre, xa que calquera partido se che pode complicar”, relata.
Coa conciencia de ir aos poucos, o mediapunta ten moitas ganas de que empece a competición, buscando sumar os tres primeiros puntos na visita ao Polvorín FC.
No acto de presentación tamén estiveron presentes Gonzalo, xerente da tenda, e Javier Puñal, director de marketing do club que agradeceu o compromiso de 4-4-2 Botas coa SD Compostela.
