-
A SD Compostela gañou por 0-3 ao CD Mensajero con tantos de Aythami, Camacho en propia porta e Miki
-
Os branquiazuis pasan de rolda dezaoito anos despois
Santiago de Compostela, a 5 de Setembro de 2018.
A SD Compostela segue facendo historia. Dezaoito anos máis tarde, este grupo de xogadores mozos e da casa conseguiron superar a primeira rolda da Copa do Rey despois de vencer ao CD Mensajero, no Silvestre Carrillo, por 0-3. Os branquiazuis deron un golpe de autoridade na Illa da Palma e plántanse na seguinte fase do torneo do KO.
Nun partido no que os nosos tiveron o control do xogo, os tantos chegaron na segunda metade. Aythami meteu o primeiro, o segundo chegou cun tanto en propia porta de Camacho e o terceiro foi obra de Miki nos últimos minutos.
A pesar de xogar lonxe da casa e un campo de herba artificial, o Compos saltou ao Silvestre Carrillo convencido de que o difícil reto que había por diante era moi posible. Así, desde os primeiros compases tentou levar a posesión e achegarse deste xeito á porta defendida por Gárate.
Álex Ares, con dous disparos que se escaparon por encima do traveseiro, e Naveira cun cabezazo que sacou o meta de maneira espectacular avisaron das intencións do cadro da capital galega. O porteiro tamén sacou dúas grandes mans a senllos disparos de Mon e Aythami na parte final do primeiro tempo, evitando que os nosos se adiantasen no marcador.
Mentres, o Mensajero tamén inquietou cun disparo de volea de Yerai desde a frontal e outro potente de Vianney, pero ambos os casos Anxo Pérez despexou o esférico con solvencia.
Tralo paso polos vestiarios, o Compos saíu máis enchufado e proba diso foi que chegou o gol aos dous minutos. Santi recolleu o balón na banda esquerda, púxoa ao punto de penalti e aí apareceu o punta canario Aythami para remachar a pelota ao fondo da rede coa súa perna dereita. O dianteiro, que marcou por segundo partido consecutivo, rematou con todo e Gárate non puido facer nada.
O tanto non inquietou a un conxunto local que o seguiu tentando e tivo a máis clara nun remate de cabeza á saída dun córner que se marchou rozando o pau. Con todo, na seguinte acción, o Compostela ampliou a vantaxe despois de que un centro desde a dereita de Brais Abelenda rebotase en Camacho e se coase na portería. O de Val do Dubra centrou potente e o defensa canario atopouse coa pelota e non puido facer nada para evitar esta xogada de mala fortuna.
A segunda diana da tarde deixaba o marcador máis de cara para o branquiazuis pero aínda faltaba a sentenza. No 87, xa cos cambios sobre o campo, Marcos Remeseiro puña o balón ao espazo para a carreira dun Miki que gañou a partida ao seu par e superou a Gárate grazas a un potente disparo cruzado.
A pesar de que Anxo aínda interveu nun tiro abaixo de David, o electrónico xa non se moveu e os nosos puideron celebrar o histórico pase á segunda rolda da Copa do Rei. Segundo triunfo nunha ‘semana de Champions’ que nos permite seguir soñando. Os nosos seguen carburando, mantendo a portaría a cero, e peregrinando cara á un soño.
FICHA TÉCNICA:
0- CD Mensajero: Gárate; Camacho (Kai, m.79), David Díaz, Orlando, Azael (Dylan, m.68); Jaime, Óscar; Vianney, Yeray, Álex; e Víctor.
3- SD Compostela: Anxo Pérez; Saro, Álvaro Casas, Piscu, Naveira; Ube, Mon; Álex Ares (David Uña, m.82), Santi (M. Remeiro, m.80), Brais Abelenda; e Aythami (Miki, m.59).
Goles: 0-1: Aythami, min.47; 0-2: Camacho p.p., min.66; 0-3: Miki, min.87.
Árbitro: Ortiz Arias, colexio madrileño. Amoestou a Azael, Álex, David e Óscar, polos locais; e a Piscu, Mon, Saro e Naveira. Ademais expulsou a Yago Iglesias (m.44) por protestar.
Incidencias: Partido da primeira rolda da Copa do Rey disputado no Estadio Silvestre Carrillo da Palma ante 575 espectadores.
