[cs_video column_size=”1/1″ video_url=”https://youtu.be/5BNqX9a1CfM” video_width=”500″ video_height=”250″][/cs_video]
-
A SD Compostela buscará regresar á senda do triunfo ante un dos galos da categoría
Santiago de Compostela, a 11 de Outubro de 2018.
A SD Compostela xa só pensa no partidazo que este domingo lle medirá a un dos galos da categoría, o Racing Club de Ferrol, na Malata. O derbi, a partir das 18.00 horas, medirá a dous equipos que buscarán regresar á senda do triunfo para seguir na parte alta da clasificación. Ademais da calidade dos xogadores, o duelo tamén estará ambientado por dúas afeccións que lle darán colorido ao estadio ferrolán.
“Os dous equipos teñen moita historia e chama tamén a atención o escenario. Do mesmo xeito que as dúas últimas semanas, será un duelo doutra categoría, pero hai que xogar contra todos e loitar sempre polos tres puntos”, explicou Yago Iglesias en rolda de prensa.
Tras dúas derrotas seguidas, o técnico branquiazul aposta por darlle normalidade á situación, xa que o equipo expón a semana para ir crecendo na idea de xogo, afianzando as bases. “Despois dos encontros a conclusión que sacamos é que nos faltou acerto de cara ao gol. Temos claro tamén que debemos mellorar nas ocasións que nos xeran, para que non nos consigan marcar, e despois acertar nas que xeramos”, analizou.
O que ten claro o equipo é que os goles chegaron por accións puntuais, porque o labor defensivo foi o mesmo en todos os encontros ata a data, o que demostra que estes dous equipos tiveron moito premio para o que fixeron. “A tempada pasada, cando perdemos con Vilalbés e Boiro, as sensacións non eran tan boas como agora, así que temos claro que sairemos desta fochanca sen ningún tipo de problema e esa é a liña para seguir”, comentou.
Ademais, a estas alturas do campionato, a palabra presión, segundo Yago, é moi inoportuna. “Hai que manter a calma porque queda moitísimo. O que si é unha oportunidade de reencontrarnos coa vitoria a través do bo xogo que ofrecemos”, destacou o adestrador ribeirense.
En canto ao rival, ambos coñécense ben tras disputar a final da Copa Deputación, un partido no que os adestradores sacaron as cartas. “Chama a atención a calidade que teñen de medio campo para adiante. Pero a maiores teñen un porteiro de Segunda División, centrais de Segunda B, Seoane que é de Primeira ou Segunda…un potencial enorme que che pode facer gol en calquera xogada”, advertiu.
Para lidar contra iso, o éxito do Compos pasa por “pensar no colectivo, no grupo, que todos traballen por e para lograr os tres puntos”. Nese plantel que viaxe a Ferrol, o corpo técnico espera contar con Marcos Remeseiro e Brais Abelenda, despois de que esta tarde xa realizaran o adestramento. “Marcos fíxoo completo e Brais case todo. A partir de como os vexamos o sábado, decidiremos”, sinalou.
Por último, o técnico e os xogadores agardan que a afección se desprace á Malata para sentir o seu apoio neste partidazo. “Polo que vin en redes estarán nun fondo e quizais non sexa o mellor lugar, pero seguro que a nosa xente, como sempre, vaise animar a seguirnos e farase notar, polo que nós tentaremos dar a nosa mellor versión e que os que veñan queden orgullosos”, concluíu.
Despois do estudo e a preparación, só falta ir restando as horas que faltan para que o árbitro pite o inicio do encontro. A SD Compostela, pola súa banda, ten as ideas claras e a vista posta no domingo ás 18.00 horas. Quere saír vencedor, regresando á senda triunfal, deste duelo doutra categoría.
