-
O 3-0 aos quince minutos sentenciou un partido no que o Compos foi moi superior ao seu rival
Santiago de Compostela, a 18 de novembro de 2018.
O inicio da SD Compostela no Vero Boquete de San Lázaro foi idílico. Mellor tarde de fútbol imposible para estrear a nova denominación do fortín branquiazul. Un 3-0 en tan só quince minutos sentenciou un encontro no que o Compos foi moi superior ao seu rival e que se acabou levando por 4-1.
Brais Abelenda, Álex Ares e Aythami encarrilaron o partido nos primeiros compases, despois, Mon rompeu a dinámica desde os once metros e, no 64, Félix maquillaría o resultado final.
Viña dicindo Yago Iglesias en semanas pasadas que se o seu equipo tivese un mínimo dun 50% de acerto nas ocasións que xeraba, sairía con marcadores moi favorables. Hoxe, no día da estrea do Vero Boquete de San Lázaro, os branquiazuis cumpriron a premisa do seu técnico e en quince minutos impecables, nos que aproveitaron tres das catro chegadas á área, certificaron un claro 3-0 inicial.
Como vén sendo habitual no seu fortín, a SD Compostela saíu cunha gran intensidade ao terreo de xogo, como se mostrou na primeira ocasión do partido. Xa no minuto inicial, Samu quedou só na área, tras recoller un rebote, pero o seu tiro forzado sacouno co pé, a córner, Cortegoso.
Semellaba que se repetía a tónica habitual, pero aos sete minutos, o balón xa acabou na rede. Aythami recuperouna no medio e púxoa en velocidade para un Brais Abelenda, que recortou cara dentro e, con pausa, meteuna rasa polo primeiro pau. O pichichi branquiazul sumou así o seu quinto tanto do curso.
O tanto animou aos nosos que, de novo por banda esquerda, chegaron á senda do gol. Xogada rápida na que recibiu Naveira en banda, centrouna ao punto de penalti e Álex Ares, chegando desde atrás, embocou de cabeza o seu cuarto gol en liga.
Tamén anotou o seu cuarto tanto, seis máis tarde, Aythami, nunha xogada que mostrou á perfección o estilo de xogo dos nosos. Álvaro Casas abriu para Brais Abelenda, o extremo encarou ao seu lateral e púxoa para Álex Ares, quen a controlou para que Aythami, en xiro, a colocase á cepa do poste. Un golazo que deixaba o partido cunha clara vantaxe en apenas quince minutos.
Por diante no marcador, o Compos seguiu percutindo ata o descanso, pero tanto Álex Ares como Josiño, en xogadas xeradas a partir da velocidade por banda de Saro, non atoparon os tres paus da portería visitante.
Á volta dos vestiarios, os branquiazuis saíron a controlar o partido, pero iso non evitou que seguise gozando de boas oportunidades, con contras tan claras como a que propiciou o cuarto tanto.
Brais Abelenda dispúñase a bater a Cortegoso no man a man, pero Fiuza empuxouno por detrás e o colexiado sinalou o punto de penalti. O día era tan propicio que, esta vez, desde o punto fatídico, a pelota por fin acabou no fondo da rede. O capitán Mon Vives, que acababa de entrar, mostrou sangue frío e anotou enganando ao porteiro.
Con todo, os visitantes reaccionaron rápido e, aos dous minutos, anotaron o tanto da honra. Carlos púxoa ao punto de penalti e Félix rematou de primeiras ao fondo das mallas para recortar distancias.
Pese ao gol, non houbo tempo para as sorpresas e o Compos certificou unha nova vitoria, na súa sexta semana invicto. Estrearon os nosos da mellor maneira posible o Vero Boquete de San Lázaro e, ademais, co tres puntos superaron a cifra que levaban o curso pasado a estas alturas.
Hai tardes que quedan para o recordo e a estrea do Vero Boquete, sen dúbida, será unha delas para os branquiazuis. Agora, tocará seguir co refacho na visita ao Arenteiro o próximo fin de semana.
FICHA TÉCNICA:
4- SD Compostela: Anxo Pérez; Saro, Álvaro Casas, Piscu, Naveira; Samu (Mon, m.58), Marcos Remeseiro (Josiño, m.32); Miky (Sergio Pereira, m.66), Álex Ares, Brais Abelenda; e Aythami.
1- CD Choco: Cortegoso; Carlos (Xián, m.66), Fiuza (Gabi Misa, m.72), Aitor, Lazcano; A. Suárez, Nacho; Palmas (Vilas, m.75), Caloi, Comis; e Félix.
Goles: 1-0: Brais Abelenda, min.7; 2-0: Álex Ares, min.9; 3-0: Aythami, min.15; 4-0: Mon (p.), min.62; 4-1: Félix, min.64.
Árbitro: Pérez Martínez, colexio ourensán. Amoestou a Marcos Remeseiro e Naveira, polos locais; e a Aitor, Fiuza e Caloi, polos visitantes.
Incidencias: Partido da décimo terceira xornada de liga do grupo 1 da Terceira División disputado no Estadio de San Lázaro ante 950 espectadores.
