[cs_video column_size=”1/1″ video_url=”https://youtu.be/Xm8zHxsics4″ video_width=”500″ video_height=”250″][/cs_video]
-
A SD Compostela quere ampliar a súa dinámica positiva de resultados este domingo contra o Paiosaco no Vero Boquete
Santiago de Compostela, a 14 de Febreiro de 2019.
O triunfo contra o Silva xa é historia e a SD Compostela pensa xa no seguinte duelo para ampliar a súa dinámica positiva de resultados. Este domingo, no horario habitual, o equipo branquiazul regresa ao Vero Boquete de San Lázaro para medirse ao Paiosaco, unha das revelacións das tempadas e que xa lle puxo as cousas moi difíciles aos nosos no encontro da primeira volta.
“É un equipo que ten moitísimo mérito. Un club humilde, veciño do Laracha e do Bergantiños, recentemente ascendido e cunha filosofía, a do seu técnico Juan Riveiro, na que nunca repiten máis de catro ou cinco xogadores no once”, explicou Yago Iglesias na rolda de prensa.
A pesar de ter apenas futbolistas contrastados na categoría, o técnico branquiazul destaca o poder do bloque rival, sempre baixo unha proposta de tres centrais. “Desde o principio usaron o 5-3-2 que agora utilizan moitos equipos e hai que telos moi en conta, xa que só perderon pola mínima contra o Bergan, gañáronlle na casa ao Racing de Ferrol e ao Ourense CF de visitantes”, valorou.
De cumprirse as expectativas, o Compos vivirá unha situación curiosa, xa que todos os conxuntos aos que se enfrontou nesta segunda volta expuxeron o mesmo esquema. Tamén fixo o propio o cadro santiagués, aínda que Yago avisa que poden adaptarse a calquera formulación. “Temos distintas maneiras de afrontar os partidos, pero o que si é seguro, e todo o mundo o sabe, é a proposta que sacaremos a escena, sexa co posicionamento que sexa”, comentou.
En base a este modelo de xogo, o plantel desexa “sacar a mellor versión na casa”, xa que cada vez é máis difícil lograr os tres puntos. Por iso, o corpo técnico ten como meta que o equipo “vaia a máis, dando mostras de crecemento e chegando á recta final do campionato en plena forma”.
Así, esta semana o equipo tivo dúas xornadas de descanso para recuperar efectivos, malia que para o domingo, en principio, non poderá contar cun Lorenzo que levou un golpe entre semana. Será, deste xeito, un dos cambios que realice o adestrador, unha premisa que manteñen para que “todo o mundo colla o nivel competitivo”.
Os que finalmente sexan da partida sairán ao 100% para que os puntos queden na casa, sabendo da importancia de lograr catro vitorias seguidas. Cun equipo que cada vez da máis mostras de madurez, Yago e os seus mozos agardan darlle unha nova alegría aos afeccionados que se acheguen ao Vero Boquete de San Lázaro.
