[cs_video column_size=”1/1″ video_url=”https://youtu.be/3-pfbaVAabs” video_width=”500″ video_height=”250″][/cs_video]
-
A SD Compostela busca o cuarto triunfo consecutivo no seu feudo neste Xoves Santo
Santiago de Compostela, a 17 de Abril de 2019.
A SD Compostela regresa ao seu fortín e nel quere seguir o seu camiño cara ao playoff de ascenso. Os branquiazuis buscan o cuarto triunfo consecutivo no Vero Boquete de San Lázaro, así como sobrepoñerse ás baixas e á última derrota en Redondela. Con este obxectivo, reciben ao CD Arenteiro na tarde do Xoves Santo.
“Son refachos e non hai que darlle moita máis preocupación que a que ten non lograr os tres puntos. Sempre tentamos gañar, pero fóra custa un pouco máis. Estamos a xerar ocasións, pero non entran, así que como na casa si, esperamos volver a ver o Compostela das últimas ocasións”, explicou Yago Iglesias na rolda de prensa.
Neste sentido, as condicións dos terreos de xogo moitas veces non axudan aos branquiazuis, malia que esta tendencia revértese cando pisan o verde santiagués. “Temos unhas condicións de adestramento e xogo exclusivas, propias doutra categoría, e aínda que nos custa cando cambiamos de superficie e dimensións, os rivais tamén se atopan aquí unhas condicións nas que poden ser máis vulnerables”, analizou o técnico.
Para manter estas sensacións, o corpo técnico terá que tirar de caderno, xa que as baixas acumúlanse esta xornada. “Alberto leva adestrando toda a semana, pero non queremos forzalo, Miki levou un golpe nunha man e está fóra, Naveira sancionado, e Casas e Samu seguen cun tratamento conservador para recuperalos ben”, detallou.
Por este motivo, o once compostelanista contará de novo con caras novas ante un rival que regresa cun técnico moi coñecido na casa, Gelucho. “Coñezo moi ben o tipo de xogo que tenta expor, e el tamén o meu, polo que será un tira e afrouxa polos tres puntos”, comentou.
O adestrador santiagués sabe polo que está a pelexar o Arenteiro, polo que non se fía dun equipo que chega á alza nas últimas semanas. “Este ano apertou a nivel económico para xuntar a futbolistas doutra categoría como Portela, Hugo Sanmartín, Noguerol ou Fajardo, polo que teñen argumentos máis que suficientes como para estar máis arriba”, destacou.
A nivel táctico, caracterízanse pola “súa organización defensiva e a capacidade para ler os tempos do encontro”, ao que suman a velocidade ao contrataque, polo que Brais Abelenda avoga por “ter a pelota, metelos atrás e que non poidan saír do seu campo”, evitando que poidan coller as costas da defensa.
Coas premisas claras, o Compos busca sumar o triunfo nesta semana tipo ‘Champions’, nun fortín que esperan que estea coas condicións de sempre para despregar o fútbol branquiazul. Tralo empate da primeira volta, os nosos buscan resarcirse coa vitoria, sumando a cuarta consecutiva, e continuando o camiño cara ao playoff.
