-
O mediocentro amplía un ano máis o seu contrato e cumprirá a súa cuarta tempada
Santiago de Compostela, a 5 de Xuño de 2019.
Samu Rodríguez Noya cumprirá a súa cuarta tempada no proxecto da SD Compostela. O mediocentro de Bembibre, un dos capitáns do plantel neste último curso, súmase ao camiño do club á Segunda B, renovando o seu contrato por un ano máis.
Aos seus 24 anos, Samu asentouse na Terceira División galega, con máis de cen encontros na categoría, sempre da man de Yago Iglesias. O técnico tróuxoo consigo da súa etapa no Noia e seguiu apostando por el no Compos, onde ocupou un papel moi importante no esquema branquiazul.
Na súa etapa en Santiago, superou os 2.000 minutos nos dous últimos cursos, nos que tamén xogou de titular nos playoff. Ata o momento, acumula 82 encontros coa casaca compostelanista en partidos oficiais, nos que ademais logrou seis goles.
Con este segundo peregrino, o club segue coa súa aposta polo talento mozo, de Santiago e comarca e con proxección no fútbol, algo que poderá seguir demostrando Samu sobre o céspede do Vero Boquete de San Lázaro.
