-
O capitán renova por un ano e sumará a súa sexta tempada no club
Santiago de Compostela, a 15 de Xuño de 2019.
O primeiro capitán da SD Compostela seguirá un ano máis no proxecto branquiazul e xa serán seis tempadas. Mon Vives González amplía o seu contrato co club ata o próximo verán, coa intención de liderar ao grupo no camiño á Segunda B.
Aos seus 24 anos, Mon converteuse nunha das pezas máis importantes do Compos. Quedou tralo descenso, e desde aquela foi un fixo nas aliñacións de Yago Iglesias durante o curso, superando con moita folgura os 2.000 minutos de xogo en cada unha delas, demostrando as súas capacidades físicas, defensivas, de creación de xogo e goleadoras, cunha gran habilidade para o lanzamento de faltas e para os córneres.
Ata o momento, o mediocentro leva un total de 134 encontros oficiais coa elástica branquiazul, cento once deles nos últimos tres cursos, con 33, 40 e 38 partidos, respectivamente. Deses, 83 foron saíndo desde o inicio e neles puido celebrar un total de dez goles, catro o primeiro e tres os dous seguintes.
Con esta renovación, o Compos da tempada 2019/20 xa conta con sete xogadores, dos que tres foron os capitáns a tempada pasada. Así, seguirán, ata agora, Álvaro Casas, Samu, Saro, Jorge Queiruga, Álvaro Naveira e Alberto Freire.
