-
O corpo técnico renova a súa vinculación co club por un ano
Santiago de Compostela, a 17 de Xuño de 2019.
A noticia que todos agardaban confirmouse esta tarde, Yago Iglesias Estepa e o seu corpo técnico seguirán á fronte do proxecto branquiazul coa intención de devolver ao seu equipo a unha categoría superior. O técnico santiagués renova a súa vinculación co club por un ano, polo que cumprirá a súa cuarta tempada dirixindo a un plantel que sempre encomiou a súa faceta.
Desde a súa chegada fai tres veráns, o adestrador, acompañado polo mesmo corpo técnico, deixou o seu selo plasmado nun conxunto que sempre aposta polo bo trato do balón, por someter ao rival a través da posesión e que foi nomeado por moitos adestradores que pasaron polo Vero Boquete de San Lázaro como o que mellor fútbol realiza da categoría.
Ademais, neste tempo, os futbolistas que estiveron baixo o seu cargo manifestaron en continuas ocasións que, co labor do técnico, melloraron os seus recursos futbolísticos, tanto a nivel técnico como táctico, calidades que casan á perfección coa filosofía da entidade, a cal leva anos apostando por xente nova, da casa e con moita proxección.
Ata o momento, na súa etapa en Santiago, Yago Iglesias dirixiu á SD Compostela nun total de 114 encontros en Terceira División, aos que se suman oito de playoff e outros dous de Copa do Rey. En Liga, con el ao mando, sumamos 64 triunfos, o que supón un 73 % de vitorias, 24 empates e 26 derrotas.
A maiores, conquistou o campionato de Liga da tempada 16/17, con 86 puntos, e tamén unha Copa Deputación, o pasado mes de agosto. Así mesmo, ostenta o récord de 10 vitorias seguidas da entidade, na 16/17, e nestes tres cursos o seu plantel sempre foi dos máis goleadores do grupo. A única espiña foi non lograr o ascenso, o cal rozou hai case un ano e tivo preto este tamén, polo que quere quitala de encima.
Deste xeito, todos estes datos e vivencias abalan a un técnico novo que sentou cátedra na súa cidade, sendo a persoa mellor preparada para dirixir o camiño do Compos á Segunda División B. Xuntos tentarémolo unha vez máis, porque ambos merecemos un salto de categoría.
