-
O dianteiro berciano destacou o proxecto deportivo e mostrou ambición na súa presentación
Santiago de Compostela, a 12 de Xullo de 2019.
Rodri Alonso Fernández, o dianteiro para a SD Compostela 2019/20, foi presentado esta mañá nas instalacións da Taberna de San Lázaro como novo xogador branquiazul. O xogador berciano, acompañado polo vicepresidente Javier García e Manuel Torres, xerente do local, mostrou moita ambición nas súas primeiras palabras.
“O Compos é un equipo moi importante a nivel galego, o proxecto deportivo é moi bo e iso é o que lle interesa a un xogador. Ademais, outros pequenos detalles, como a cidade ou o campo, fan que a elección de vir aquí sexa máis fácil”, explicou Rodri.
Precisamente, a resposta final, a pesar de ter algunha outra oferta, non lle resultou complicada de dar. “A aposta máis firme creo que foi a do Compostela, polo que a decisión non foi complicada”, asegurou.
Nas súas conversacións con Manu, confesou que o que pretende o Compos del é “ambición, porque se merecen estar noutra categoría, traballo, ilusión como o que máis e a partir de aí aproveitar o meu estilo de xogo rápido, con desmarques, choques e goles”, detallou.
Para iso, prefire actuar como referencia, malia que tamén pode facelo en ambas bandas pola súa velocidade. “Estou moito máis cómodo de dianteiro centro, é a miña posición preferida e onde creo que rendo máis”, confesou.
Con todo, non se quixo mollar cunha cifra de goles, pero comentou que a todos lles gusta rozar a vintena. De momento, só quere pensar na pretempada, en coller sensacións tras moitas semanas parado e en entrar no grupo, onde lle esperan algúns ex-compañeiros.
“Con Antas será o terceiro ano seguido e con Baleato estiven en Bergantiños. Está moi ben reencontrarse con eles, porque máis que compañeiros, para min son amigos”, destacou. A maiores, agarda tamén “facer un grupo o máis ameno posible, que sexa san, porque é o importante para lograr os retos”.
Xunto a eles, e o resto do plantel, cre que o club ten unha gran base. “Formouse un equipo moi competitivo, con moitas renovacións importantes e que coas novas fichaxes fan un bloque bo”, concluíu.
