-
Sairán á venda o xoves, por 49 euros, nas oficinas do club e na tenda 4-4-2 Botas
Santiago de Compostela, a 3 de Setembro de 2019.
A tenda 4-4-2 Botas, no Centro Comercial Área Central, acolleu esta mañá a presentación das novas equipacións da SD Compostela para a tempada 2019/20, a do camiño cara á Segunda División B. Coa presenza de David Soto, Mon Vives e Rodri Alonso como modelos, o club sacou á luz o secreto mellor gardado ata a data, as camisetas que vestirán os seus xogadores a partir de mañá mesmo, con motivo da final da Fase Autonómica da Copa Federación.
No acto, ademais, estiveron presentes Juan Carlos Gesto, secretario do club; Gonzalo, xerente da tenda deportiva de Errea en Santiago; Pablo Núñez, en representación de Cobres San Rafael; e Javier Puñal, director de márketing do Compos.
Este último, precisamente, foi o encargado de explicar os principais cambios respecto a pasadas campañas, que chegan na cor da camiseta visitante e no pescozo de ambas. “Na segunda valoramos dar un cambio radical. Queremos que sexa un ano importante, de moitas alegrías, e merecía uns equipamentos acordes a iso. Este amarelo, combinámolo cun azul cyan, e ademais volvemos ao pescozo redondo, que levabamos anos sen eles”, analizou.
Nos equipamentos destaca a presenza de Cobres San Rafael na parte frontal, como patrocinador principal, e Witland Centro de Negocios na parte traseira debaixo do número, un dos patrocinadores oficiais. “Agradecemos o seu apoio ao proxecto e á entidade neste curso tan ilusionante”, afirmou a responsable da área comercial.
A pesar de que se estrearán mañá en competición, sairán á venda ao público o vindeiro xoves 5 de setembro, ao prezo habitual de 49 euros. Estas poderanse adquirir tanto nas oficinas do club, no Estadio Verónica Boquete, na tenda 4-4-2 Botas, en Área Central, e na tenda online da entidade, na web oficial www.sdcompostela.com.
“Sempre tiveron boa acollida e agardamos que guste e que vexamos moitas por Santiago, que é importante para que siga crecendo a marca Compos”, concluíu Javier.
Impresións
Os tres xogadores que participaron no acto foron os primeiros en sacar as súas impresións sobre as camisetas, que seguen sendo da marca Errea. “Teñen boa pinta. Era a primeira vez que as viamos e esperamos lograr cousas bonitas con elas”, afirmou Mon.
“Son moi bonitas. Especialmente gústame a segunda equipación pola súa cor e despois, en canto a comodidade, parecen cómodas”, sinalou Soto.
Por último, Rodri Alonso valorou o comezo do campionato e o que resta de competición, na que vestirán as camisetas que probaron hoxe por primeira vez. “O inicio foi mellor imposible, pero queda moita liga, esperamos facer un bo papel mañá, nunha competición á que lle daremos moita importancia, e encarar o domingo contra o Barco con boas sensacións”, apuntou.
A maiores, sorteouse unha bufanda entre os asistentes á presentación, tal e como se apuntou desde as redes sociais do club, a cal foi a parar a Manu César, fiel seguidor da SD Compostela e membro da peña Brigadas Branquiazuis.
