- Os extremos branquiazuis foron os asistentes dos dous primeiros goles galegos
Santiago de Compostela, a 12 de Febreiro de 2020.
A Selección Galega UEFA xa está clasificada para a Fase Final da Copa das Rexións e logrouno cun claro protagonismo dos tres xogadores da SD Compostela que estaban convocados. Os branquiazuis axudaron ao combinado dirixido por Iván Cancela a superar ao combinado de Euskadi e pasar así a unha Final Four que se disputará en Semana Santa.
Samu e Brais Abelenda, que repetían convocatoria trala súa participación na primeira fase, e Miki, que debutaba, viaxaron onte á Cidade Deportiva das Rozas co plantel autonómico para buscar o pase á rolda definitiva e, tras 90 minutos, conseguírono.
Os tres futbolistas branquiazuis saíron no once titular galego neste cruzamento decisivo, sendo moi protagonistas no devir do encontro. No primeiro tanto, ao cuarto de hora, Brais Abelenda puxo o balón ao espazo para a cabalgada de Miki Villar e o extremo de Nigrán serviu a asistencia atrás para que Adri Castro selase o primeiro gol da matinal.
Xa na segunda metade, e tras estar a piques de marcar o propio “lóstrego de Nigrán” o segundo, sería Brais Abelenda o que poñería o pase da morte para que Adri Castro asinase o seu dobrete particular e devolvese a vantaxe galega ao marcador. Ao final, o partido terminou con vitoria da Selección Galega por 2-3, despois duns últimos minutos nos que Miki, no 77, e Samu, no 84, foron substituídos polo técnico galego.
Co obxectivo conseguido, os nosos regresarán hoxe para terras galegas e poñeranse ás ordes de Yago Iglesias mañá mesmo para preparar o duelo deste próximo domingo contra o RC Deportivo Fabril.
