- O porteiro deixa a entidade branquiazul por motivos persoais e xa non regresará aos adestramentos este próximo luns
Santiago de Compostela, a 3 de Xuño de 2020.
Anxo Pérez Barbazán non continúa na SD Compostela ao rescindir o seu contrato de mutuo acordo co club. O porteiro de Negreira decidiu deixar a entidade branquiazul por motivos persoais, despois de dúas tempadas, polo que xa non regresará aos adestramentos preparatorios do playoff exprés, programados a partir deste próximo luns 8 de xuño.
O gardameta de 24 anos abandona o club despois de dúas campañas nas que o seu protagonismo foi de máis a menos. No primeiro ano disputou un total de vinte e cinco encontros, alternando a súa posición baixo os paus ao longo de todo o curso, mentres que neste segundo xogou tan só cinco encontros, divididos entre Copa Deputación e Copa Federación.
O club quere agradecer a Anxo o seu compromiso durante a súa etapa en Santiago, na que ademais de demostrar os seus grandes dotes coas luvas, foi tamén clave para o bo ambiente que impera no plantel. Ademais, a SD Compostela deséxalle a maior das sortes para o seu futuro, tanto no plano futbolístico coma no persoal. Moitas grazas, Anxo.
