- Tras unha toma de contacto sen contratempos, os vinte e cinco xogadores están citados para o luns ás 10.00 horas
Santiago de Compostela, a 13 de Xuño de 2020.
A SD Compostela recupera, aos poucos, a normalidade. Tras unha toma de contacto cos adestramentos na que estiveron divididos en dous grupos, os vinte e cinco xogadores están citados para este luns ás 10.00 horas para levar a cabo a primeira sesión grupal desde o parón do confinamento.
Nos primeiros catro días sobre o céspede do San Lázaro II, os branquiazuis foron collendo sensacións co campo e co balón, un ritmo que se verá incrementado aínda máis nesta segunda semana. Afortunadamente, non houbo ningún contratempo físico, polo que todos poderán adestrar con normalidade.
Ademais de aumentar a carga das sesións, tamén se incrementará a súa cantidade. Así, os nosos adestrarán luns, martes, xoves, venres e sábado no campo anexo San Lázaro II. Nesta ocasión, as xornadas de descanso están organizadas para o mércores e o domingo.
Do mesmo xeito, xa con todos os integrantes ás ordes de Yago, o tempo dos adestramentos aumentará ata unha duración aproximada de hora e media, ao igual que o resto da tempada.
Baixo estas circunstancias, terá lugar unha nova semana de preparación para o playoff exprés, para o que restan trinta e catro días. Con ese obxectivo en mente, Pato, Álex Díaz, Iker Caballero, Saro, Sergio Pereira, Yosi, Álvaro Casas, Soto, Queiruga, Pedro Leis, Jimmy, Samu, Baleato, Pablo Antas, Diego López, Bicho, Josiño, Miki, Hugo Sanmartín, Gabri Palmás, Brais Abelenda, Antón Olveira, Manu Rivas, Primo e Christian volverán o luns á acción.
