- As camisetas foron presentadas esta mañá nun acto no Estadio Verónica Boquete de San Lázaro
Santiago de Compostela, a 15 de Setembro de 2020.
Xa son unha realidade. As camisetas da SD Compostela 20/21 saíron hoxe á luz. Cun vídeo a través das redes sociais e un acto de presentación, que tivo lugar no Estadio Verónica Boquete de San Lázaro, o club mostrou á súa afección un dos segredos mellor gardados, as indumentarias que portarán os nosos polos campos da Segunda División B nun ano tremendamente ilusionante.
O evento realizado no fortín branquiazul contou coa presenza de membros da directiva da SD Compostela, así como cargos de Cobres San Rafael, empresa que estará presente na parte frontal das indumentarias. Ademais, Samu Rodríguez e Pablo Antas exerceron como modelos.
Nos novos deseños, e tal como explicou ante os medios de comunicación o presidente Antonio Quinteiro, existe un claro protagonismo da Catedral e do Camiño de Santiago, en consonancia coa celebración do ano Xacobeo neste 2021.
Deste xeito, a primeira equipación, a branquiazul, conta coa imaxe da Catedral de Santiago, emulando as camisetas históricas dos anos de Primeira División. Mentres tanto, a segunda, que este ano será verde, está marcada pola figura do “peregrino”, o cal xa veu sendo utilizado en pasadas campañas.
“As dúas camisetas teñen un atractivo moi especial, esperamos que os afeccionados as garden nas súas casas como recordo e esperemos tamén que lucindo esta camiseta logremos grandes resultados na Segunda División B, facendo gozar aos nosos fieis”, comentou Antonio Quinteiro.
Do mesmo xeito, aproveitou a ocasión para reiterar o seu agradecemento a Cobres San Rafael. “Agradecer a Cobres San Rafael o apoio ao noso proxecto, o cal non se basea só no patrocinio e na imaxe na camiseta do primeiro equipo, senón que tamén fortalece o traballo que realizamos no fútbol base. É un apoio para facer accións no ámbito deportivo cos equipos de Santiago e dos arredores, conseguindo lazos de unión para o desenvolvemento dos máis novos”, concluíu o presidente.
