- Debutará contra o Unionistas, o 18 de outubro, e estrearase en casa contra o Deportivo
Santiago de Compostela, a 15 de Setembro de 2020.
A SD Compostela xa coñece a folla de ruta para a primeira fase da tempada de regreso á Segunda División B. Esta mañá, a Real Federación Española de Fútbol deu a coñecer o calendario para a campaña 20/21. Encadrado no Subgrupo A de o Grupo 1, o club debutará o 18 de outubro visitando ao Unionistas de Salamanca.
A estrea, por tanto, será a fin de semana do 18 contra o equipo no que milita un exxogador branquiazul, Aythami Perera. Mentres tanto, o debut en casa, o 25 de outubro, deparará o primeiro derbi do ano. O Vero Boquete de San Lázaro vivirá a súa posta de longo na división de bronce cun SD Compostela vs RC Deportivo da Coruña.
Na xornada 3, haberá un novo duelo autonómico, xa que os branquiazuis desprazaranse a O Vao para enfrontarse ao Coruxo; e á seguinte fin de semana, de novo partido en casa contra o CD Guijuelo.
Tras un parón dunha semana, a acción volverá o 22 de novembro con tres derbis consecutivos. Así, os nosos mediranse, consecutivamente, ao Racing Club de Ferrol, Pontevedra e RC Celta de Vigo B, acabando o ano contra o Zamora, en casa. Pola súa banda, o 2021, arrincará co último encontro da primeira volta, previsto para o 10 de xaneiro, no que o Compos se medirá ao Salamanca CF UDS.
Esta primeira fase regular concluirá na fin de semana do 20/21 de marzo, precisamente, contra o rival que hai uns anos privou aos nosos do ascenso.
Á conclusión da competición, os tres primeiros loitarán polo ascenso á Segunda División, do cuarto ao sexto pelexarán polo salto á Primeira División RFEF, mentres que os catro últimos loitarán por quedar na Segunda División RFEF e evitar o descenso.
