- O mediapunta confía en que a imaxe contra o Deportivo sexa a liña a seguir
Santiago de Compostela, a 28 de Outubro de 2020.
Hugo Sanmartín enfrontarase este domingo ao Coruxo, un club no que disputou unha tempada en Segunda División B. Coñecedor da categoría e da dificultade da visita a O Vao, o mediapunta compostelanista confía en que a imaxe mostrada contra o Deportivo sexa a liña a seguir para a tempada.
“Esperamos que a imaxe mostrada contra o Deportivo, sexa a liña para seguir a partir de agora. Ao final, hai que darlle valor ao club de que mantivese o bloque, con xogadores que veñen de Terceira, e iso nótase no campo”, explicou Hugo en rolda de prensa.
Por iso, destaca a proposta realizada polo Compos. “Hai que darlle moito mérito e poñer en valor o que facemos, porque somos un equipo que queremos sempre balón e que facemos ataques posicionais, o máis difícil no fútbol actual. A maioría, con todos os meus respectos, espera plegadiño e sae a correr, pero o que propón o Compostela vai moito máis alá, é máis complicado”, remarcou.
Coa súa visión de adestrador, Hugo analizou a imaxe do equipo ante o cadro herculino. “Controlamos o partido case todo o tempo. Aínda que si é verdade que eles teñen moita calidade individual e ao final sempre che chegan, nos últimos minutos tivemos un par de ocasións nas que nos faltou algo de frescura, porque defender a un equipo así en certos momentos é complicado e vaste cansando. Cos cambios, puidemos refrescar o equipo e ter ese chance”, analizou.
Ademais, valorou a proposta de Yago Iglesias ante o rival a bater. “Tivo unha aposta arriscada, con Josiño e Brais de interiores, pero as cousas con mecanismos e traballo saen. Levamos traballando así desde o día uno e non imos cambialo”, asegurou.
Deixando ao carón a última xornada, toca pensar na próxima saída, a visita ao Coruxo, un equipo e un campo que Hugo coñece moi ben. “O Vao é un campo difícil, que parece grande pero non o é tanto, que as bandas caen en pendente e que se vai facendo máis curto. Eles en casa son moi fortes, ten grandísimos xogadores e van propoñernos un partido moi complicado”, comentou no acto realizado nas instalacións de Panadería O Cornecho, patrocinador individual do xogador para esta tempada 2020/21.
Por outra banda, adiantou que para final de ano espera publicar un libro de fútbol e para marzo ou abril outra novela.
