- O defensa navarro, con ficha sub-23, firma por dúas tempadas e procede do Peña Sport
Santiago de Compostela, 30 de xuño de 2022
Martín Salvador Erro (05/07/2001, Pamplona) é a segunda fichaxe da SD Compostela para a Tempada 2022/23. O lateral esquerdo, de 20 anos, firma por dúas campañas e chega procedente do Peña Sport, equipo co que debutou o pasado ano na Segunda RFEF. Con ficha sub-23, o mozo defensor achegará sabia nova e talento ao plantel branquiazul.
Martín Salvador é un lateral zurdo con amplo percorrido, rápido e cun extraordinario golpeo de balón dende longa distancia, calidades estas que levaron á dirección deportiva da SD Compostela a afrontar a súa fichaxe.
Na súa última tempada, no Peña Sport, do grupo 2 da Segunda RFEF, o defensor disputou 27 partidos, 21 deles como titular, para un total de 1.929 minutos, nos que ademais meteu un gol.
Anteriormente, tras desenvolver a súa traxectoria en categorías inferiores no Osasuna, pechando a súa etapa xuvenil no equipo de División de Honra, Martín debutou como sénior no Calahorra B, de Terceira División, disputando 23 duelos, incluído a eliminatoria de cuartos de final polo ascenso.
Ese gran rendemento valeulle a oportunidade para subir de categoría o pasado verán, nivel no que seguiu demostrando a súa gran valía, a cal mostrará agora na capital galega.
Tras a súa fichaxe, a SD Compostela 22/23 conta xa con once xogadores con contrato: Pato Guillén, Borja Rey, Roque, Álvaro Casas, Pablo Crespo, Martín Salvador, Pablo Antas, Fer Beltrán, Jordan, Parapar e Pablo Durán.
Benvido a Santiago, Martín!
