- O histórico xogador compostelanista regresa ao club da súa vida para dirixilo na Segunda RFEF
- Será a terceira etapa como técnico do club, tras un periplo en Preferente e outro en Segunda B
Santiago de Compostela, 1 de xullo de 2022
‘O Rei’ Fabiano está de volta. Fabiano Pessoa Soares será o adestrador da SD Compostela na Tempada 2022/23. O histórico xogador compostelanista, o que posúe o récord de partidos xogados no club en Primeira División, regresa ao Compos dos seus amores para dirixilo na Segunda RFEF. O técnico brasileiro firma por unha tempada, despois dunha última experiencia no Vitória da Série C de Brasil.
Falar de Fabiano é facelo da historia do Compos. O extraordinario mediocentro de Río de Janeiro xogou nove tempadas na entidade, todas elas en Segunda e Primeira División, para un total de 357 partidos, nos que ademais marcou 46 goles. Chegou en 1992, ascendeu á máxima categoría e mantívose no equipo ata 2001, regresando, tras un periplo no Botafogo, na 02/03.
Tras a súa retirada como futbolista, deixando unha meritoria traxectoria no fútbol brasileiro e español, Fabiano pasouse aos bancos, iniciando a súa carreira nos campos galegos. Precisamente, sería o Compos o primeiro club sénior no que desenvolvería a súa faceta como adestrador, nunha breve etapa de tres meses en 2006, en Rexional Preferente.
Tras ese pequeno paso, e outra tempada no Bergantiños, Fabiano regresaría á SD Compostela en outubro de 2009, para dirixir ao equipo na Segunda División B. Nesa campaña dirixiría ao equipo vinte e nove encontros.
Desde aquela, Fabiano desenvolvería a súa etapa nos bancos no Estradense, o Estoril Praia de Portugal (seis tempadas), o Atlético Paranaense de Brasil, o Jeonnam Dragons de Corea (dúas campañas), o Barra FC de Brasil e a última no EC Vitória tamén de Brasil.
Con moita experiencia e 56 anos, ‘O Rei’ Fabiano está de volta para loitar co equipo polo ascenso a Primeira RFEF.
Benvido a casa, Fabiano!
