- O RC Celta B será o rival este mércores, ás 19.30 horas, no Vero Boquete
Santiago de Compostela, 1 de agosto de 2022
Este mércores 3 de agosto, a SD Compostela de Fabiano terá a súa segunda proba de pretempada coa disputa do VI Memorial Antonio Bermúdez. Co RC Celta de Vigo B como rival, os branquiazuis volverán ao Vero Boquete, ás 19.30 horas, para seguir coa súa preparación para a liga.
Esta cita ineludible no calendario estival do club, coa que se lembra a figura dun gran amigo como era Antonio Bermúdez, foi presentada esta mañá no estadio compostelanista, nun acto no que estiveron presentes o xornalista, e fillo do homenaxeado, Toño Bermúdez; o director das relacións institucionais do Compos, Ramón Castro; o adestrador do primeiro equipo, Fabiano Soares; e o porteiro Pato Guillén.
O acceso ao encontro será gratuíto para os novos abonados, mentres que os que non o son terán que pasar polo despacho de billetes. O custo da entrada será de 10€ para adultos e gratis para menores de idade.
En todo caso, atendendo a que a Campaña acaba de arrincar, todos aqueles que queiran asistir ao partido e que non teñan tempo a realizar o seu abono a tempo, deberán gardar a entrada, xa que se lle descontarán posteriormente os dez euros no prezo do Abono.
