- Os nosos queren volver sumar os tres puntos nun novo derbi galego
Santiago de Compostela, 14 de outubro de 2022
A SD Compostela volve viaxar este domingo para disputar un novo derbi. Os nosos, tras mellorar a súa imaxe nas últimas semanas, mediranse ao filial do Lugo coa premisa de continuar coas boas sensacións e volver á senda da vitoria. Fabiano espera un equipo igual de competitivo que os últimos partidos e que estea ao 200% para superar a un rival duro.
Estado do plantel. Estamos a ter algúns problemas, pero esta semana recuperamos a Elliot e estamos contentos. Non vou estar chorando polos que non están. Son bos xogadores, pero os que están a xogar tamén. Cantos máis para elixir, mellor, pero se non poden, estou contento igual.
Fichaxe de Iván Martín. Un xogador adestrando só é unha cousa e en grupo vese que é outra. A priori véxoo difícil para que chegue este domingo, pero falarei con el e a ver se está. O que vexo é que está baixo de forma, pero teremos conversación con el para decidir.
Portería a cero. Levo tempo dándolle voltas á cabeza para ter un equipo máis competitivo. Contra o líder, un equipo difícil, competimos ben e fomos competitivos. Despois, xogar con liña de catro ou cinco é igual, porque o importante é que temos que ser competitivos. Estou a poñer aos xogadores que máis transpiran para darlle unha forza extra ao equipo e encaixando aos poucos as pezas. Os que queiran entrar, terán que ser igual de competitivos ou máis dos que están a xogar agora.
Recuperar a Jordan. Jordan traballou ben, é un xogador diferente, é o cerebro, ten calidade para mover ao equipo e filtra bos pases, polo que me gusta moito. Aínda así, Fer tamén está a xogar nesa posición e estao facendo tamén ben. En todo caso, Jordan é un xogador diferente e é mellor telo no noso lado que no contrario.
Dúbida no once. Esta semana adestramos con liña de catro con Fer e Jordan no once, pero tamén con liña de cinco alternando cun ou outro. Esta noite decidirei, porque mañá darei as pinceladas finais para o partido do domingo. Será así, con liña de catro e eles dous ou con liña de cinco e un deles acompañando a Darío.
Lugo B. Gústame a súa proposta de xogo, porque presiona alto, obriga a rifar o balón ao rival e gústame. Ademais, ten xogadores desequilibrantes que forman un moi bo equipo. Estamos a iniciar o campionato, pero a súa idea é moi boa e teremos que estar ao 200% para sacar algo positivo de alí.
Diferenzas co Guijuelo. É un equipo que presiona moi ben aos rivais e xa vimos nos vídeos que conseguen moitos roubos en campo contrario e despois son verticais. Temos que estar a tope para conseguir dobregar a un rival con bos futbolistas e boa proposta de xogo.
Contrarrestar o seu xogo. Todo o mundo ten as súas debilidades. Teremos que explotalas, pero a verdade é que é un equipo que dá gusto velo xogar, polo que será difícil. En todo caso, estamos adestrados para os que nos imos a enfrontar, espero neutralizalos e contrarrestar o seu xogo para conseguir a vitoria.
