- O Compos quere sumar un triunfo máis na súa visita, este domingo, ao Palencia
Santiago de Compostela, 2 de decembro de 2022
A SD Compostela viaxa este domingo a Palencia coa premisa de poder prolongar o seu bo estado de forma. Con catro vitorias consecutivas e instalados en postos de playoff, os nosos queren darlle continuidade á imaxe das últimas semanas no Estadio Nueva Balastera. Fabiano, que ten a todo o plantel de novo dispoñible, confía no traballo dos seus para sumar de novo os tres puntos.
Explicación da directiva. Mentres non estea asinado, non se pode dicir nada, porque en fútbol pode pasar de todo. Dixéronnos que o importante é que esteamos tranquilos, veña esa xente ou non, o club daranos soporte, ata final de tempada, para tentar o ascenso e nada máis. Loxicamente, como non está pechado, mellor non falar nada, porque en fútbol xa se viu de todo.
Centrarse no deportivo. Nada de descoidos. Temos un partido complicado o domingo, fará moito frío e temos que espabilar para conseguir gañar a un equipo que nos apertará, que vén dunha derrota na casa e un empate fóra e quererá gañar. Temos que facer un bo partido e un bo equipo para conseguir os tres puntos alí.
Un equipo que cre na idea. É difícil propoñer cousas novas despois de seis anos. Os xogadores comprárono, están a confiar no modelo de xogo e na idea nosa. Loxicamente, non fixemos nada, empezamos mal, agora gañamos, pero temos que seguir. Temos que ser un equipo gañador, afeito a gañar e o Compostela, por historia, ten que ser este equipo. Estou encima deles para que ninguén se relaxe e quen o faga quedará fóra, porque sen intensidade nin orde non somos un equipo. Quero que o Compostela sexa un equipo ordenado e intenso, porque calidade temos, para gañar os partidos, afacernos a gañar, como este último mes, e oxalá sigamos así.
O Palencia. É un equipo que me gustou, forte, que presiona alto, que ten bos xogadores, pero destacando máis o bloque. Loxicamente, imos explotar os seus puntos algo débiles que teñen e a ver se somos quen. Temos que ser moi ordenados e con intensidade moi alta para poder competir un partido difícil e fóra de casa.
Regreso dos sancionados. A verdade é que estou a adestrar coas dúas formacións. Gustoume moito a actuación de Samu e Kike. Estaba a gustarme tamén como o facían Casas e Roque nos partidos anteriores. Calquera once que saque, responderá. Adestrei onte e hoxe coas dúas formacións e, esta noite, despois do partido de Brasil, decidireime, dando mañá as últimas pinceladas para sacar un once forte, ordenado e con moita intensidade para poder gañar alí.
Todos preparados. En principio, temos a todo o mundo apto e iso é bo. Algún terá que caer da convocatoria, pero iremos dezaoito xogadores fortes para competir, igualar condicións con eles e oxalá sexamos quen de superalos.
