- A nova fichaxe da SD Compostela foi presentado en Ferrecal, o seu patrocinador oficial
Santiago de Compostela, 2 de xaneiro de 2023
Jaime Santos foi presentado esta tarde como novo xogador da SD Compostela. O mediocentro ovetense, que está a desexar poder debutar co equipo este domingo, realizou as súas primeiras declaracións como futbolista branquiazul na sede de Ferrecal, empresa compostelá que dá un paso máis no seu apoio ao proxecto, patrocinando á fichaxe de inverno do club.
Adaptación ao equipo. En canto á adaptación, creo que está a ser bastante rápida, porque hai un grupo espectacular, fancho fácil no día a día e a posta a punto é ir collendo a forma. Levaba uns meses sen competir e iso nótase, pero creo que a fin de semana estarei dispoñible para o que o míster necesite de min. A ver se se poden sacar os tres puntos, que é o importante.
Fichaxe polo Compos. Pode soar a tópico, todo o mundo di o mesmo, pero neste caso é unha realidade. Cando che chama o Compostela, por moito que non estea no seu mellor momento en canto a historia, precisamente por ese pasado e polo que significa para a cidade e o fútbol español, creo que é un club e un proxecto importante, polo que houbo poucas dúbidas, foi entenderse rápido e aquí estou.
Achega ao plantel. Pódolle achegar compromiso. Son un xogador de equipo, ao que lle gusta que sexa todo en conxunto, non son nada individualista. En todo caso, polas miñas características, son un xogador que podo achegar no último terzo, con moita asociación, moito último pase, con capacidade para chegar desde atrás e anotar os máximos goles posibles. En todo caso, son máis de traballo colectivo que algo individual.
Posición no rombo. É un sistema novo para min. Segundo o que estou a ver, a miña posición ideal sería no pico do rombo, pero podo xogar nos costados e mesmo de dobre dianteiro, xunto a un compañeiro. Unha das miñas características é que son versátil, pódome adaptar ao que me pidan. Non son exquisito, pero quizais onde máis cómodo estea é no pico do rombo.
Contacto con Fabiano. Pídeme traballar, adaptarse, está moi próximo comigo, pregúntame todos os días se estou ben. Nese sentido, non tivo moitas palabras comigo, porque se centra nos xogadores dispoñibles, pero está pendente de min e agradézollo.
Equipo para o ascenso. Esa é a idea. Cando me decanto por este proxecto é precisamente porque o Compostela viña facendo unha tempada boa, bastante digna e o obxectivo é claro: devolver ao club, neste caso, a Primeira RFEF, que é unha categoría importante. Hai equipo e material para conseguilo.
SD Compostela e Ferrecal.
A posta de longo de Jaime Santos tivo lugar nas instalacións da compañía compostelá, no Polígono do Tambre, onde o novo xogador da SD Compostela presentouse ante os medios de comunicación. Acompañándoo estivo o xerente da empresa, quen lle desexou moita sorte para o que queda de tempada.
“Desde Ferrecal estamos moi contentos de anunciar o noso acordo de patrocinio coa SD Compostela e, máis concretamente, coa recente fichaxe de Jaime Santos. Desde que naceu a nosa empresa, estivemos vinculados ao deporte, por iso é tan importante para nós seguir apoiando a un club como o Compos. Quero finalizar desexándolle ao equipo moita sorte no partido deste domingo e no resto da tempada”, destacou Juan Francisco Vázquez, xerente-administrador de Ferrecal.
