-
A última sesión da Compos Escola celebrouse en A Grella con Luis Bonilla e Stily
Santiago de Compostela, 31 de maio de 2023
Coa quinta e última xornada da Compos Escola deuse por pechado, este pasado martes 30 de maio, a primeira edición dun novo formato formativo, posto en marcha esta tempada, pola Canteira Picheleira. Unha iniciativa que tiña por obxectivo a formación dos adestradores do propio club, así como dos técnicos dos equipos da contorna.
A proposta, nacida dentro do seo dos propios adestradores da Canteira Picheleira, serviu como punto de encontro entre formadores da base e tamén dos clubs conveniados, que se foron sumando de xeito paulatino a esta convocatoria. Ademais, dentro destas xornadas, deixouse a porta aberta ao acceso de adestradores doutros clubs con interese en cada unha das temáticas propostas.
Unha iniciativa formativa da Canteira Picheleira
Pola Compos Escola, nesta primeira edición, pasaron Lino Estévez, da Escola de Fútbol Denis Suárez; Alexis Padrón, de INEF Coruña; David Solleiro, do Olimpique de Marsella; Borja Facal; e, nesta última xornada, Luis Bonilla, do RC Celta C – Gran Peña; e Antonio “Stily”, adestrador do Galicia de Mugardos.
Nestas cinco sesións, as temáticas versaron dende a organización e estruturación dun club de fútbol base, pasando polo adestramento de capacidades condicionais, o adestramento e coñecemento do xogador a nivel micro ata a xestión persoal dos xogadores.
Todas estas actividades enriqueceron os encontros programados, aportando coñecementos de relevancia para o traballo do día a día dos nosos adestradores cos xogadores e xogadoras da Canteira Picheleira.
Ademais, dentro desta actividade, queremos agradecer o apoio de dous establecementos que acolleron todas as xornadas, agás a celebrada en Dumbría. Por un lado, A Nave de Vidán, que se encargou das tres primeiras citas, e, polo outro, Brasería A Grella, na que se pechou este ciclo. Ambos locais son patrocinadores do club e sempre están ao dispor para colaborar con todo tipo de iniciativas.
