Samu Araújo, lateral esquerdo, con ampla experiencia en Segunda B, firma por unha tempada
Santiago de Compostela, 3 de agosto de 2023
Samuel Araújo Fernández (Vigo, 09.12.95) é novo xogador da SD Compostela para a Tempada 23.24. O lateral esquerdo, con ampla experiencia en Segunda B, firma por unha campaña, ata 2024.
Samu Araújo é un lateral con gran proxección ofensiva, bo toque de balón e unhas grandes calidades para o golpeo, tanto no balón parado como para poñer centros á área. Ademais, tamén posúe unhas extraordinarias condicións defensivas e destaca tamén pola súa experiencia e polivalencia, xa que tamén pode actuar como central zurdo. Todo iso levou á dirección deportiva a afrontar a súa fichaxe para completar a zaga branquiazul.
Aos seus 27 anos, chega á SD Compostela tras dúas campañas no Pontevedra, a primeira en Segunda RFEF, logrando o ascenso co cadro granate, e esta última en Primeira RFEF. En ambos anos foi un fixo nos onces granates, acumulando 49 partidos disputados (27 na primeira e 22 na segunda), a amplisíma maioría deles como titular.
Anteriormente, Samu Araújo formouse na canteira do RC Celta de Vigo, onde coincidiu con varios dos seus novos compañeiros. Tras dar o salto desde xuvenís, incorporouse ao Celta B, en Segunda B. Estaría catro tempadas e disputaría 94 encontros, debutando tamén co primeiro equipo en 2015, en San Mamés, nos Oitavos de Final da Copa do Rey.
Tras acumular grandes campañas, en 2017 deu o salto á canteira do FC Barcelona, fichando polo Barça B de Segunda División, aínda que tan só disputaría un encontro en todo o curso. E da cidade condal, pasaría a outra gran canteira nacional, a do Atlético de Madrid, para xogar no seu filial. No Grupo I de Segunda B, co equipo colchoneiro disputaría 35 encontros, todos menos un coma titular, marcando dous goles e disputando a Fase de Ascenso a Segunda.
Tras ese gran ano, daría o salto a Polonia, para asinar unha breve estancia no Arka Gdynia, regresando no mercado invernal á Cultural Leonesa, onde estaría un ano e medio. En terras leonesas disputaría 21 encontros entre Segunda B e Copa do Rey.
Coa súa fichaxe, Manel Menéndez conta con 19 xogadores para iniciar unha ilusionante Tempada 23.24: Pato, Borja Rey, Riki Mangana, David Soto, Álvaro Casas, Kike, Pablo Crespo, Martín, Samu Araújo, Antón de Vicente, Pablo Antas, Fer Beltrán, Jordan Domínguez, Jaime Santos, Pep Caballé, Parapar, Juampa, Fran López e Manu Barreiro.
Samu Araújo incorporarase aos adestramentos do equipo nos próximos días.
