-
O Compos terá sete semanas de preparación para arrincar a liga
Santiago de Compostela, 17 de xullo de 2024
A SD Compostela 2024/25 xa está en marcha. O equipo iniciou este mércores 17 de xullo unha nova tempada co primeiro adestramento da pretempada. Unha xornada con moitas caras novas, con gran presenza de canteiráns e Antón Permuy á fronte do equipo.
Nesta primeira sesión estival, marcada polas altas temperaturas, puidéronse ver, por primeira vez como compostelanistas, ás novas fichaxes: Santi de Prado, Manu Rivas, Iago Domínguez, Jesús Ocaña, Diego González, Javier Rabanillo e Giuliano Bertino.
Tamén estaban os xogadores que continúan da pasada campaña, entre eles, os tres capitáns: Álvaro Casas, Pablo Antas e Samu Rodríguez. Xunto a eles, Roque, David Soto, Kike, Pablo Crespo, Landeira, xa con ficha do primeiro equipo; Hugo Matos e Manu Barreiro.
E para completar o roster do Compos que inicia esta intensa pretempada, programada con sete semanas de preparación, nas que se alternarán as sesións de adestramento con partidos amigables, unha boa nómina de xogadores da Canteira Picheleira. Así, neste inicio, están co primeiro equipo Hugo, Dani Varela, Moreta, Adri, Sálamo, Balsa, Ozores, Baña e Marcos, do Sigüeiro.
No que respecta aos amigables, o Compos ten xa programadas tres citas de verán, que se ampliarán en próximas datas. Os nosos mediranse ao Arenteiro, o vindeiro venres 26 de xullo, en Baltar; ao Boiro, en Barraña, o 3 de agosto; e ao Bergantiños e Ourense CF, nun triangular en Ordes, o 17 de agosto.
