-
Os nosos mantivéronse no encontro ata os minutos finais, nos que os locais sentenciaron
Pontevedra, 19 de xaneiro de 2025
A SD Compostela non puido sacar nada positivo da súa visita a Pasarón. Os nosos chegaron a igualar a contenda na segunda metade, pero o Pontevedra respondeu rapidamente para levar os tres puntos. Xa no desconto, dous goles locais cando o Compos estaba envorcado, selaron o 4-1 final.
Na primeira metade, o Pontevedra dominou por completo a posesión do esférico ante un Compos repregado con dúas liñas de catro ben plantadas. Aínda que non conseguían roubar, os nosos tampouco pasaban excesivos apuros atrás. Con todo, nunha acción cun chisco de fortuna, un disparo desde a frontal quedou morto na área tras tocar nun defensa e Charly, moi atento, adiantábase a todos para fusilar a Rabanillo. 1-0 co que se chegou ao descanso.
Na segunda parte, o Compos cambiou o debuxo, volveu xogar con carrís e a aposta non puido saír mellor. Comezaron a pisar máis campo rival, a chegar á área e acabou chegando o gol. Unha subida de Manu Rivas, recentemente entrado, propiciou o tanto do empate. O xogador branquiazul subiu a banda, tentou un pase da morte para o debutante Iker Gil que foi cortado por un defensa, pero o rebote quedou a pracer para marcar a portería baleira. 1-1.
Eran os mellores momentos branquiazuis, pero rapidamente chegou a resposta do líder. Tiro cruzado de Yelko Pino e 2-1. Tocou volver remar e repuxéronse os nosos, que tiveron de novo o empate na cabeza de Manu Barreiro, pero o seu croque, á saída dun córner, sacouno un defensa na liña.
Con esa vantaxe mínima, chegouse aos minutos finais, no que o Compos arriscou máis para buscar o gol. A súa ocasión, no 88, un centro de Manu Rivas, de novo vencedor pola banda, ao que non chegou Iker Gil por moi pouco.
Foi a última, xa que no desconto chegaron dous novos goles locais. Primeiro, Dalisson, aproveitando unha contra; e despois Rufo, quen recibiu nunha posición moi discutida polos nosos.
Tras esta derrota, o Compos segue en duodécima posición, con 23 puntos. Tras enfrontarse aos dous primeiros, agora tocará mellorar os números nos próximos partidos. O primeiro, este próximo domingo, ás 12.00 horas, contra o Deportivo Fabril no Vero Boquete.
FICHA TÉCNICA
4 – Pontevedra CF: Edu Sousa; Fontán, Garay, Mario Gómez (Igor, min.81), Héctor (Brais Abelenda, min.66); Rares, Yelko Pino; Xabi Domínguez (Rufo, min.76), Dalisson, Álex González; e Charly (Iago Novo, min.66).
1 – SD Compostela: J. Rabanillo; Roque, David Soto, Pablo Crespo, Ocaña (Manu Rivas, min.64); Santi de Prado, Álvaro Casas (Samu, min.46), Selasi (Trasi, min.61), Fer Cano; Hugo Matos (Iker Gil, min.61) e Carlos Cinta (Manu Barreiro, min.39)
GOLES: 1-0: Charly, min.26; 1-1: Manu Rivas, min.65; 2-1: Yelko Pino, min.67; 3-1: Dalisson, min.89; 4-1: Rufo, min.90+5.
ÁRBITRO: Sánchez Ingidua (Salamanca). Amoestou a Álvaro Casas, Selasi, Pablo Crespo e Manu Rivas, polo Compos.
INCIDENCIAS: Estadio Municipal de Pasarón (Pontevedra). Xornada 19 do Grupo 1 da Segunda RFEF disputado ante 4.000 espectadores. Gran ambiente nas bancadas cun nutrido grupo de afeccionados da SD Compostela.
