-
O mediocentro Fausto Tienza, con pasado en Primeira e Segunda División, chega da UD Ibiza, de 1ª RFEF
Santiago de Compostela, 31 de xaneiro de 2025
Fausto Tienza Núñez (Badaxoz, 08/01/1990) é novo xogador da SD Compostela. O experimentado mediocentro, de 35 anos, con pasado en Primeira e Segunda División, chega tras unha tempada e media na UD Ibiza, de 1ª RFEF. Firma ata final de tempada.
Fausto Tienza achegará á medular do Compos liderado, experiencia e poderío, calidades estas que o levaron a ter unha exitosa e longa carreira no fútbol profesional español.
O novo xogador compostelanista chega a Compostela tras tempada e media na UD Ibiza, coa que disputou 40 partidos, un deles de Playoff de Ascenso a Segunda, marcando tres goles e sendo un dos capitáns do equipo insular.
Esta foi a última experiencia dun xogador formado na canteira do Valencia e que conta cunha extensa traxectoria por clubs do noso país. Debutou como sénior nas filas da Nucia, pasando posteriormente por Caravaca, La Muela, Melilla e o filial do Betis, equipo co que debutaría en Primeira División.
Tras esa breve experiencia en Primeira, ficharía pola AD Alcorcón, disputando dúas campañas en Segunda División nas que daría un gran rendemento, o cal lle abriu as portas do Osasuna. Co cadro de Pamplona, disputaría unha tempada en Primeira División e media en Segunda, disputando a outra media no Cádiz. E de Cádiz marchou ao Extremadura, tamén da categoría de prata.
Tras destacar na súa terra, ficharía polo Panathinaikos, da liga grega, equipo no que só estaría media tempada, antes de regresar a España para fichar polo Nàstic de Tarragona. Alí estivo outra campaña e media, fichando o verán do 2021 polo Racing de Santander, sendo un líder dentro e fóra do campo para lograr o ascenso a Segunda División e asentarse ao curso seguinte na categoría. Esa sería a súa última experiencia antes de fichar no Ibiza.
Por iso, o Compos faise cos servizos dun futbolista de nivel, con 20 partidos en Primeira División, 123 en Segunda División e 177 entre Segunda División B e Primeira Federación.
Tras asinar o seu contrato, e previo recoñecemento médico, Fausto Tienza sumarase aos adestramentos do equipo o vindeiro luns.
Benvido, Fausto!
