-
Os branquiazuis foron superiores ao Langreo, con numerosas ocasións para gañar, pero acaban perdendo 2-1
Santiago de Compostela, 2 de febreiro de 2025
A SD Compostela non puido sumar, a pesar de merecelo, ningún punto en Langreo. Os branquiazuis foron superiores ao seu rival, contaron con numerosas ocasións a favor, pero o acerto nas áreas volveu condenar ao equipo adestrado por Antón Permuy.
Con Markitos como titular e moi activo no ataque, o Compos saltou mellor ao estadio Ganzábal. Encerrando ao seu rival, os primeiros avisos chegaron pronto. Santi de Prado tívoa de volea no sete e Markitos no vinte. A nova fichaxe compostelanista tívoa aínda máis clara xusto antes da media hora, pero o remate ao centro de Santi estrelouse no pau, cando o porteiro xa estaba superado.
Con todo, tanto foi o cántaro á fonte que acabou rompendo. Centro de Markitos ao segundo pau, toque de cabeza de Manu Barreiro e Santi de Prado remachou a porta baleira, tamén coa súa testa. Era o premio ao visto no campo e o segundo gol do carril na tempada.
Con todo, cando parecía que se chegaría ao intermedio con vantaxe do Compos, na última xogada, os nosos encaixaron un gran golpe. Tanto de Breñé, tras un saque de esquina, na primeira aproximación local.
A pesar do golpe, tralo intermedio, o Compos volveu saltar concentrado e incisivo. Aínda que non atopaba o acerto no último pase, á hora de partido tería as súas en dúas opcións seguidas. Primeiro, Santi de Prado atopouse co corpo de Adrián Torre nun man a man e, dous máis tarde, Ocaña mandouna rozando o pau.
Pasaban os minutos e parecía que estaba máis preto o tanto do Compos, pero o que chegou foi un novo golpe dos locais. Nun mal despexe desde a liña de fondo, no 85, a pelota quedou franca na frontal para Lucas Suárez, que a rebentou á escuadra, imposible para Rabanillo.
Este segundo tanto fixo moito dano aos nosos, que non puideron reporse, aínda que o seguiron tentando ata o final.
Unha dura derrota que non embaza o bo traballo realizado sobre o céspede. Aínda que non se sumou ningún punto, mantendo este estilo as vitorias estarán máis preto. E para iso, este próximo domingo ás 17.00 horas, os nosos queren gañar, si ou si, contra o Marino de Luanco na casa.
FICHA TÉCNICA
2 – UP Langreo: Adrián Torre; Ordóñez, David Fernández, Álex Menéndez, Enol Rodríguez (Lucas Suárez, min.69); Guille Cueto (Omar Álvarez, min.63), Joselu Guerra, Sergio Orviz, Pablo Álvarez (Bryan Reyes, min.89); Breñé e Pablo Ares.
1 – SD Compostela: J. Rabanillo; Roque, David Soto, Pablo Crespo (Álvaro Casas, min.77), Ocaña; Selasi, Pablo Antas; Santi de Prado (Manu Rivas, min.72), Fer Cano (Hugo Matos, min.38), Markitos; e Manu Barreiro.
Goles: 0-1: Santi de Prado, min.44; 1-1: Breñé, min.45+4; 2-1: Lucas Suárez, min.85.
Árbitro: Munárriz Mateos (Navarra). Amoestou a Joselu Guerra, David Fernández e Ordóñez, polo Langreo.
Incidencias: Estadio Novo Ganzábal (Langreo). Xornada 21 do Grupo 1 da Segunda RFEF. Os xogadores de ambos equipos portaron un brazalete verde con motivo da celebración do Día Mundial contra o Cancro.
