-
O mediapunta Carlos Pérez chega libre tras disputar a primeira parte da tempada no Sabadell
Santiago de Compostela, 4 de febreiro de 2025
Carlos Pérez Sánchez (Almàssera -Valencia-, 05/02/2000) é novo xogador da SD Compostela. O terceiro reforzo invernal do equipo branquiazul chega libre tras desvincularse do seu último club, o CE Sabadell. Firma ata final de tempada.
Carlos Pérez é un atacante que destaca pola súa calidade, a súa capacidade asociativa, así como pola súa habilidade para dar o último pase. Ademais, trátase dun futbolista que, a pesar da súa mocidade, conta cunha importante experiencia en Segunda B-Primeira Federación.
A Compostela chega coa premisa de axudar ao equipo no xogo ofensivo, achegando calidade e pase para o bo facer do Compos, demostrando toda a calidade que atesouran as súas botas.
A nova fichaxe do Compos aterra na capital galega tras unha primeira parte da campaña na que disputou trece partidos co Sabadell de Segunda Federación, once de Liga e dous de Copa Catalunya, nos que logrou un gol e unha asistencia.
Formado nas categorías do Levante e do Valencia, disputando mesmo a UEFA Youth League co cadro ‘Che’, Carlos Pérez deu o salto ao fútbol sénior co Valencia Mestalla, de Segunda B. Serían dúas campañas nas que xogou 23 partidos. Posteriormente, ficharía no Alzira, co que disputou 32 partidos e marcou un gol.
Este gran rendemento abriulle as portas da canteira do Granada, sendo peza capital do ascenso do seu filial a Primeira Federación. No seu primeiro ano, xogou 34 encontros e marcou 3 goles, axudando ao equipo ao salto de categoría, sendo titular nos catro duelos do playoff. E xa en Primeira RFEF, volveu ser moi protagonista, xa que disputou 31 partidos, nos que marcou un tanto e repartiu dúas asistencias. Esta sería a súa última experiencia antes de fichar polo Sabadell.
Carlos Pérez, tras asinar o seu novo contrato, xa está a viaxar para Santiago e mañá unirase aos adestramentos da SD Compostela para poder estar xa dispoñible esta próxima fin de semana, se o corpo técnico así o decide.
Benvido, Carlos!
