-
O Compos gañou 3-1 á Gimnástica, con dous goles na recta final, nun partido vital para os nosos
Santiago de Compostela, 20 de abril de 2025
Terceiro triunfo seguido dun Compos que segue vivo na Liga. Vitoria na casa, 3-1, contra a Gimnástica de Torrelavega que permite aos nosos saír dos postos de descenso directo. Dous tantos na recta final, ambos en centros laterais, permiten ao Compos seguir crecendo e seguir loitando.
Tras gañar na casa contra o Salamanca e en Cantabria contra o Laredo, o Compos quería encadear o seu terceiro triunfo seguido. Co mesmo once que o pasado sábado, coa excepción da entrada de Samu por Fausto Tienza, o equipo saíu a por todas desde o inicio ante un rival que se repregaba na procura dunha contra.
Co apoio do público, entregado unha vez máis, o equipo creceu co paso dos minutos e foise en busca do gol. Tívoo na súa cabeza Pablo Crespo, pero a súa cabezada escapouse por moi pouco. E atopouno Manu Barreiro. En ambos casos, un elemento común, o centro de Pablo Antas.
O dianteiro centro volveu marcar na liga e fíxoo cun auténtico golazo de primeiras, conectando a pelota coa zurda cara á escuadra da portería visitante.
Con todo, cando mellor estaba o equipo, reaccionaron os visitantes. Primeiro Rabanillo estirouse ben ao disparo de Chus Ruiz, pero no córner, Primo, excompostelanista, cazou a pelota na área e mandouna á rede. Coa igualada, 1-1, chegouse ao descanso.
Á volta dos vestiarios, o Compos mellorou e foise a polo necesario segundo tanto. A Samu escapóuselle por moi pouco, nunha boa acción pola dereita, e Manu Barreiro non chegou, pouco máis tarde, por nada a un gran centro de Hugo Matos, que entrara ao verde minutos antes.
Pasaron os minutos e a presión comezaba a pesar ante un Compos que o buscaba, pero que non acababa de atopar a ocasión, ata que no 82 atopou o premio. Fer Cano púxoa con música, Barreiro deixouna morta coa súa cabeza ante a saída do porteiro e o seu rexeite quedou na área para que Pablo Antas, por segunda semana consecutiva, aparecese coa súa cabeza para empuxala á rede.
Eses segundos entre que a pelota saíu da cabeza do medio de Monterroso ata que a pelota acabou na rede pareceron interminables, pero houbo premio e a bancada toleou.
Xa con vantaxe, os nosos durmiron o encontro, aínda que sen rexeitar ir ao ataque e así chegou o terceiro tanto. Centro de Roque desde a dereita ao segundo pau para a aparición dun Manu Rivas que, de novo, volveu mollar. Gran remate de primeiras coa súa zurda, potente, para selar o triunfo, no que foi o seu sexto gol en liga.
Cos tres puntos, o Compos sae de descenso directo e sitúase na posición de playout. Toca seguir nas dúas finais que quedan para poder conseguir o obxectivo. O vindeiro domingo, ás 12.00 horas, horario unificado, tocará unha nova final, esta vez, contra o Real Ávila no Estadio Adolfo Suárez.
FICHA TÉCNICA
3 – SD COMPOSTELA: Rabanillo; Roque, David Soto, Álvaro Casas (Fer Cano, min.55), Pablo Crespo, Ocaña (Manu Rivas, min.75); Samu (Trasi, min.75), Pablo Antas; Iker Gil (Hugo Matos, min.55), Markitos (Kike, min.84) e Manu Barreiro.
1 – RS GIMNÁSTICA DE TORRELAVEGA: Iván Crespo; Chus Ruiz (Laken Torres, min.76), Miguel Goñi, Iago Parga, Pasines; Cristian Canles (Uri, min.67), Diego Campo (Tobar, min.67), Alberto Gómez, Saúl (Unai, min.67); Dani Gómez (Puras, min.60) e Primo.
GOLES: 1-0: Manu Barreiro, min.29; 1-1: Primo, min.36; 2-1: Pablo Antas, min.82; 3-1: Manu Rivas, min.87.
ÁRBITRO: Bordons Romero (Madrid). Amoestou a Pablo Crespo, polo Compos; e a Alberto Gómez, pola Gimnástica.
INCIDENCIAS: Estadio Vero Boquete de San Lázaro (Santiago de Compostela). Xornada 32 de Liga do Grupo 1 da Segunda RFEF disputado ante 1.500 espectadores.
