-
O mago de Monterroso, heroe do último ascenso branquiazul, despídese da SD Compostela despois de seis tempadas
Santiago de Compostela, 16 de xuño de 2025
O legado de Pablo Antas na SD Compostela chegou ao seu fin. O mago de Monterroso e o Compos separan os seus camiños tras seis tempadas. Despedimos a un futbolista exemplar, dentro e fóra do campo, que será lembrado por sempre na memoria dos afeccionados compostelanistas, en especial, polo seu gol en Balaídos que permitiu o último ascenso branquiazul.
Pero non só iso. Pablo Antas foi nestas seis campañas un compás no centro do campo do Compos, o temón do equipo, un futbolista que nos permitiu gozar dun gran fútbol no Vero Boquete de San Lázaro.
O mediocentro despídese do club tras 152 encontros defendendo a camiseta da SD Compostela, nos que anotou ademais 13 goles, lembrando especialmente esa diana en Balaídos que permitiu o ascenso á Segunda División B en 2020.
Por iso, desde a SD Compostela só temos palabras de agradecemento por todo o que construíu Pablo Antas na súa etapa en Santiago. Moitísimas grazas por todo o teu traballo e moita sorte para o teu futuro. O Compos sempre será a túa casa.
