-
Álex Cobo, tras unha brillante campaña na UD Ourense, buscará no Compos o seu cuarto ascenso a Segunda RFEF
Santiago de Compostela, 18 de xuño de 2025
A portería da SD Compostela ten un novo gardián: Álex Cobo Padillo (Sant Boi do Llobregat, 06/07/1995). O experimentado porteiro chega ao Compos tras unha brillante campaña na UD Ourense, con ascenso incluído, e co obxectivo de conseguir o seu cuarto salto de categoría a Segunda RFEF/Segunda B. Firma por unha tempada.
O Compos faise cos servizos dun porteiro de envergadura, con capacidade para sacar o balón xogado e con grandes calidades baixo paus, como veu demostrado na súa dilatada traxectoria no fútbol galego, tanto en Terceira como en Segunda RFEF.
Álex Cobo chega ao Compos tras o lograr o ascenso coa UD Ourense, na que estivo os dous últimos anos. Faio tras unha campaña sensacional na que só encaixou 14 goles en 28 partidos, todos como titular, sendo parte fundamental do campionato conseguido, con xornadas de antelación, polo equipo das Burgas. Deses 28 duelos, en 17 deles deixou a portería a cero, parando ademais un penalti no decisivo encontro ante o Estradense (segundo clasificado) da xornada 30.
Este foi o último ascenso logrado por un Álex Cobo experto nestas lides, e é que tamén o logrou co Deportivo Fabril e o Arousa. Precisamente, o filial coruñés foi a súa primeira experiencia en Galicia, tras saír do Lleida, estando durante catro tempadas, nas que disputou 87 partidos.
Posteriormente, pasaría polo Arousa, dúas campañas e 36 partidos; o Bergantiños, un ano e seis partidos; e a xa citada experiencia na UD Ourense, con 64 encontros.
Tralo seu brillante papel en Ourense, Álex Cobo chega ao Compos co obxectivo de defender con todas as súas calidades a portería do Vero Boquete e lograr o desexado ascenso, o seu cuarto ascenso.
Benvido, Álex!
