-
Samu renova o seu contrato e cumprirá a súa décima tempada no Compos
Santiago de Compostela, 19 de xuño de 2025
Un líder para o proxecto da SD Compostela. Samuel Rodríguez Noya seguirá un ano máis vestindo a camiseta branquiazul. O mediocentro de Val do Dubra amplía a súa vinculación co club para encabezar ao equipo na procura do ascenso. Renova por un ano e cumprirá así a súa décima tempada no Compos.
A SD Compostela asegúrase a continuidade dun líder, dentro e fóra do campo, que guiará ao equipo como capitán. Un temón para a medular compostelanista, que achegará traballo, tesón e moito fútbol.
Deste xeito, Samu disputará a súa décima tempada no Compos, o seu Compos, no que acumula xa 235 partidos xogados, o sexto futbolista con máis encontros disputados na historia do club, cifras que seguirá aumentando.
Un referente para todos e un futbolista chave que ten un claro obxectivo: devolver ao Compos á Segunda RFEF.
