-
Goris, que xa debutara en 2ª RFEF, será parte do plantel da SD Compostela na Tempada 25/26
Santiago de Compostela, 18 de xullo de 2025
Do filial ao primeiro equipo. Joaquís Goris Abelenda (Bembibre, 14/04/2004) formará parte do plantel da SD Compostela na Tempada 2025/26. O canteirán compostelanista, que xa debutara en Segunda RFEF, promociona tras dúas grandes campañas no Sigüeiro. Ocupará ficha sub-23 e firma por unha tempada.
Aos seus 21 anos, Goris é un mediocentro creativo, con gran capacidade para asociarse e levar o tempo do equipo, unhas calidades que xa demostrara nas categorías de formación e que consolidou en Preferente.
Goris chegou ao Compos no seu segundo ano de xuvenil, procedente do Conxo Santiago, para reforzar o equipo de División de Honra. Tras dous bos cursos ascendeu ao Sigüeiro, no que foi peza fundamental durante estas dúas últimas campañas.
No filial do Compos disputou 67 partidos oficiais, 33 o primeiro ano (27 de titular) e 34 no segundo (32 de titular), para sumar máis de 5.000 minutos de xogo. Neles, ademais, marcou 8 goles.
Ao mesmo tempo, durante todos estes anos foi un habitual nos adestramentos do primeiro equipo, formando parte tamén das pretempadas e chegando a debutar en partido oficial en Segunda RFEF. Foi en xaneiro de 2024, nun duelo no Vero Boquete contra o Raio Cantabria, cando Goris saltou ao campo nos últimos minutos para rubricar a vitoria branquiazul por 3-1.
Con moita ilusión, o luns iniciará os adestramentos como membro de pleno dereito do primeiro equipo do Compos, arrincando unha tempada na que achegará o seu traballo e calidade co obxectivo de acadar o ascenso.
Parabéns, Goris!
