-
Parapar, tras lograr o ascenso a 1ª RFEF co Talavera, regresa ao Compos para ser un puñal pola banda
Santiago de Compostela, 17 de xullo de 2025
A maxia está de volta: Juan Manuel Parapar Calleja (A Coruña, 14/05/1991) regresa á SD Compostela. O extremo coruñés volverá facer diabruras na banda do Vero Boquete cos seus caneos e desbordes. Chega tras unha campaña en Talavera, onde conseguiu o ascenso a 1ª RFEF, e firma por unha tempada.
Deste xeito, Parapar regresa ao club no que comezou a súa carreira deportiva en España, tras un longo periplo por terras suízas. En Compostela estivo tres tempadas, todas elas na Segunda RFEF, disputando un total de 96 encontros, nos que ademais marcou 8 goles e repartiu máis dunha decena de asistencias.
Como ben coñece a afección compostelanista, Parapar achegará velocidade, desequilibrio e capacidade para romper defensas, xa sexa coa súa ampla nómina de caneos ou co seu disparo de media e longa distancia. Un xogador diferencial para o ataque e que será un puñal pola banda do Vero Boquete.
Volve ademais cunha clara misión: acadar o ascenso. Un éxito que xa saboreou esta pasada campaña no Talavera de la Reina. Co conxunto manchego conseguiu o salto a 1ª RFEF a través do playoff, nun ano no que foi parte importante do logro conseguido, xa que disputou 31 partidos, 22 como titular, marcando 2 goles e repartindo 6 asistencias.
Aos seus 34 anos, Parapar conta tamén cunha longa traxectoria no fútbol suízo, antes da súa primeira etapa no Compos. No país helvético, con diferentes equipos, disputou 8 tempadas, con máis de 200 encontros, e anotou máis de 40 goles, nunha etapa na que foi escalando categorías ata chegar a Segunda División.
Coa ilusión de volver a casa, Parapar agarda volver dar moitas alegrías á afección do Compos, conseguindo o desexado ascenso.
Benvido de volta, Parapar!
