-
Diego Rodríguez, con ficha sub23, pode actuar tanto de central como de lateral
Santiago de Compostela, 16 de xullo de 2025
Mocidade, talento e polivalencia para a liña defensiva da SD Compostela: Diego Rodríguez Vázquez (A Coruña, 01/10/2004) é novo xogador branquiazul. O defensa coruñés, con ficha sub23, chega tras unha brillante segunda volta no CD Boiro. Firma por unha tempada.
Diego Rodríguez, aos seus 21 anos, é un defensa polivalente, con experiencia tanto de central como de lateral, que destaca pola súa rapidez, o seu coñecemento táctico e as súas grandes calidades defensivas para gañar duelos.
O novo xogador da SD Compostela vén de render a un altísimo nivel no Boiro, club ao que chegou cedido o pasado mercado invernal, procedente do Bergantiños. En Barraña foi un fixo nos onces, sendo clave para a salvación do equipo. Disputou 19 partidos, 18 como titular, para sumar 1.600 minutos disputados. Neles, ademais, marcou un gol.
A esta experiencia en Terceira suma tamén a do seu ano de estrea como sénior, nas filas do RC Celta C. Co filial celeste foi peza fundamental do equipo, nunha campaña na que o equipo quedou ás portas do ascenso a Segunda RFEF. Pechou o curso con 36 partidos disputados, 35 como titular, para máis de 3.000 minutos. Marcou 2 goles, un deles na final galega do playoff.
Ademais, cabe citar que Diego Rodríguez formouse nas categorías inferiores do Ural ata que asinou co RC Celta no seu segundo ano de xuvenil. Na Madroa logrou dous títulos de liga na División de Honra, antes de dar o salto ao seu filial.
Con gañas de continuar coa súa proxección e demostrar as súas calidades, chega ao Compos co obxectivo de lograr o ascenso a Segunda RFEF.
Benvido, Diego!
