-
Charly vén de ascender a Primeira RFEF e de realizar varias tempadas destacadas
Santiago de Compostela, 15 de xullo de 2025
Un ‘9’, con moito gol, para o ataque: Carlos López Vilasánchez “Charly” (Ares, 09/02/1996) é novo xogador da SD Compostela para a Tempada 2025/26. O dianteiro coruñés, que vén de ascender a Primeira Federación co Pontevedra, firma por unha tempada.
Charly é un dianteiro zurdo que, aos seus 29 anos, acumula unha gran experiencia no fútbol galego e nacional. Un ariete cunha gran capacidade goleadora e que destacou, alá onde xogou, pola súa facilidade para ver porta, tanto en accións ao espazo como resolvendo na área.
Chega ao Compos tras unha última etapa de dúas campañas no Pontevedra, nas que xogou 66 partidos e anotou 16 goles, tres deles ao seu novo club. Coa camiseta granate cabe destacar a súa xeira de oito xornadas consecutivas marcando, o que lle valeu ser o ariete con mellor media de goles/minuto de toda a Segunda RFEF, con 110 minutos.
Formado nas categorías inferiores do Deportivo e do Racing Club de Ferrol, Charly comezou a dar os seus primeiros pasos no fútbol sénior da man do cadro departamental, contando con minutos no primeiro equipo cando aínda era xuvenil. En todo caso, a súa primeira campaña ao completo disputouna no Galicia de Mugardos, en Terceira, pasando posteriormente polas filas do Cerceda, co que logrou o ascenso a Segunda División B, e As Pontes. No cadro pontés viviría a súa explosión goleadora con dúas tempadas, unha en Preferente e outra en Terceira, nas que marcou 39 goles.
Froito da súa actuación destacada, fichou no Bergantiños, co que conseguiu o ascenso a Segunda RFEF. En Carballo estaría dous anos e medio, marcando 16 dianas, destacando especialmente as 9 que anotou na primeira volta da Campaña 22/23. Isto levouno, no mercado invernal, ao Zamora, onde sumou outros 6 tantos, para converterse, con 15 goles, no pichichi do Grupo 1 e no segundo máximo realizador de toda a categoría nesa tempada.
Coa ambición de dar moitas alegrías á afección compostelanista cos seus goles, Charly asina no Compos co claro obxectivo de seguir sendo un talismán para os ascensos. Ata a data suma 5 (Racing de Ferrol -sendo xuvenil-, Cerceda, As Pontes, Bergantiños e Pontevedra) e entre cella e cella ten o sexto.
Benvido, Charly!
