-
Os nosos superaron por 2-1 ao Céltiga para lograr o primeiro triunfo da segunda volta
Santiago de Compostela, 15 de febreiro de 2026
Tras varias xornadas, o Compos estreou a marcadora de vitorias na segunda volta. Os nosos superaron por 2-1 ao Céltiga, na casa, para consolidar o liderado. Un duelo igualado que levou o cadro branquiazul con dous tantos de Armental e Parapar.
O partido no Vero Boquete, baixo unha choiva persistente, comezou moi igualado, con dous equipos que tiñan moi claro o seu plan e coas defensas dominando sobre os ataques. Así, salvo un intento de Parapar, que non puido finalizar, non se viron grandes ocasións, polo que se chegou ao intermedio coa igualada inicial.
Con todo, nada máis arrincar a segunda metade, todo mudou. No primeiro minuto, Armental facía unha obra de arte para colocar o balón na escuadra contraria. Un gol de bandeira que levantou ao público do seu asento. 1-0.
Con todo, os visitantes sobrepuxéronse rápido e aos catro minutos puxeron as táboas de novo no luminoso ao transformar Adrián Rodríguez un penalti.
Co 1-1, o Compos buscou electricidade para atopar os espazos na sólida defensa visitante, aínda que lle custaba acertar no último pase. E de tanto tentalo, atopounos. Sería nas botas de Unai, que se estreou hoxe como titular.
A última fichaxe compostelanista rompeu liñas desde atrás cunha cabalgada de moito nivel e, cando chegou á área rival, tivo a temperanza para pola coa zurda ao segundo pau para a entrada de Parapar que, ante tan bo servizo, só tivo que meter a cabeza para empuxala á rede. Un golazo, delirio na bancada e o quinto gol do extremo coruñés na liga.
Co 2-1, os nosos amornaron os ánimos, dominaron a pelota e impediron calquera indicio de reacción visitante. Deste xeito, selouse un sólido triunfo que permite ao Compos estrear a marcadora de vitorias na segunda volta e gañar terreo no liderado.
FICHA TÉCNICA
2 – SD COMPOSTELA: Álex Cobo; Valín, Pablo Crespo, Damián Noya (Aarón Martínez, min.34); Diego Uzal, Unai (Rosón, min.83), Samu (Goris, min.71); Parapar, Antón Guisande, Armental (Cañi, min.71); e Maceira (Charly, min.71).
1 – CÉLTIGA FC: Antón Pérez; Nicolás del Río, Pedro Delgado (Carlos Gómez, min.68), Arnosi, Rubén Casás, Álex Rodríguez (Santi Figueroa, min.56); Julio Rey (Sobrido, min.76), Óscar Iglesias, David Giráldez, Anxo Llanos (Dani Prada, min.56); e Adrián Rodríguez (Marcos Blanco, min.76).
GOLES: 1-0: Armental, min.46; 1-1: Adrián Rodríguez (p.), min.50; 2-1: Parapar, min.81.
ÁRBITRO: Sergio Arredondas (Vigo). Amoestou a Valín, Damián Noya e Parapar, polo Compos; e a Rubén Casás e Pedro Delgado, polo Céltiga.
INCIDENCIAS: Estadio Vero Boquete de San Lázaro (Santiago de Compostela). Xornada 21 de Liga do Grupo 1 da Terceira RFEF disputado ante 1.047 espectadores.
