-
O Compos superou por 2-1 ao Estradense e chegarán con opcións á última xornada
Santiago de Compostela, 1 de maio de 2026
O Compos consegue a vitoria na casa, 2-1, para seguir con opcións na última xornada de liga. Os nosos superaron ao Estradense, con goles de Charly e Parapar, e sumaron os tres puntos que necesitaban para poder pelexar o ascenso ata o final.
Saía o Compos ao Vero Boquete coa misión de gañar e meter presión sobre o seu rival directo. Co triunfo entre cella e cella, os nosos saíron concienciados da misión contra un rival sen nada que perder e que tentou dominar coa pelota.
Tras media hora sen ocasións, o partido rompeuse tras unha detención de máis de dez minutos pola grave lesión de Landeira. Unha vez reiniciado o choque, Parapar avisou co lanzamento directo da falta coa que volveu correr o reloxo. E tres máis tarde, chegou o primeiro gol da mañá. Tras unha xogada con moitos rebotes, a pelota caeulle a Charly, na área, que disparou de zurda para superar por abaixo a Pablo Brea. O seu segundo gol da tempada e 1-0.
Con todo, reaccionaron rápido os visitantes, cinco máis tarde, grazas a un bo tanto de Edu, quen disparou cruzado facendo imposible a estirada de Álex Cobo.
E volveu golpear o Compos, nada máis arrincar de centro, pero esta vez a pelota non acabou na rede. Centrou Armental, tocouna Charly coa zurda, pero co porteiro superado, o esférico golpeou no traveseiro. Por iso, chegouse ao intermedio coa igualada.
Á volta dos vestiarios, os nosos saíron cunha marcha máis, quizais por ese impulso dos minutos finais da primeira parte e comezaron a chegar as oportunidades. Primeiro probouno Samu, pero sacou o porteiro; logo foi Parapar o que non chegou por moi pouco, en boca de gol, ao centro de Maceira, e despois sería o propio dianteiro, que entrou desde o banco, o que rozou o tanto cun disparo cruzado.
Non entraban as ocasións e os nervios parecían percibirse no campo, pero de tanto insistir, acabou chegando o gol, no 82. Nun balón longo, peiteou Maceira, correu con fe Parapar, regateou ao porteiro e marcou a portería baleira para levar o delirio á bancada. Sétimo gol e 2-1.
Quedaban dez minutos, pero o Compos defendeu con orde e pechou o partido coa necesaria vitoria. Tres puntos vitais para poder seguir na pelexa e chegar á xornada final con opcións.
FICHA TÉCNICA
2 – SD COMPOSTELA: Álex Cobo; Valín (David Rosón, min.65), Diego Ouzal, Pablo Crespo, Damián Noya; Samu (Aarón Martínez, min.53), Unai, Goris (Maceira, min.53); Parapar, Armental (Lucas, min.88) e Charly (Cañi, min.65).
1 – CD ESTRADENSE: Pablo Brea; Ángel, Caraban, Landeira (Ander, min.30), Pichi; Miguel (Óscar, min.80), Brais Vidal; Gerard (Hugo Padín, min.68), Raúl (Mella, min.68), Pedrosa; y Edu (Ian, min.80).
GOLES: 1-0: Charly, min.33; 1-1: Edu, min.38; 2-1: Parapar, min.82.
ÁRBITRO: Manuel Casanova (Ourense). Amoestou a Valín, Pablo Crespo e Álex Cobo, polo Compos; e a Pedrosa, Landeira e Miguel, polo Estradense.
INCIDENCIAS: Estadio Vero Boquete de San Lázaro (Santiago de Compostela). Xornada 33 de Liga do Grupo 1 da Terceira RFEF disputado ante 1.860 espectadores.
