-
O defensa Jordan Sánchez regresa ao Compos despois de dez tempadas en equipos de Segunda B e Primeira Federación
Santiago de Compostela, 14 de xullo de 2026
Despois de 10 anos, Jordan Sánchez (Ourense, 05/01/1991) volve á súa casa. O experimentado lateral convértese en nova fichaxe da SD Compostela para a Tempada 2026/27. Firma ata 2027, tras catro campañas ao máis alto nivel nas filas do Arenteiro, as tres últimas na Primeira Federación.
O novo xogador da SD Compostela coñece moi ben o Vero Boquete, e é que, coa camiseta branquiazul, sendo aínda ben mozo, comezou a despuntar na súa carreira futbolística. Foron tres tempadas e media (o primeiro medio ano en Terceira e os outros tres na Segunda División B) nas que se fixo coa banda dereita de San Lázaro, disputando 100 encontros e marcando 13 goles.
Con 35 anos, regresa ao Compos tras unha última etapa ao máis alto nivel co Club Deportivo Arenteiro. Co equipo do Carballiño disputou 144 partidos oficiais en catro tempadas, sendo fundamental tanto para o ascenso á Primeira Federación como nas históricas salvacións na categoría de bronce do fútbol nacional.
Esta foi a súa última experiencia lonxe de Compostela, nun periplo de dez anos no que pasou polo Sabadell, Arenas de Getxo, Linense, Alcoyano e Zamora, todos eles equipos de Segunda B e Primeira Federación.
Coa ilusión de volver á súa casa, Jordan asina no Compos para achegar ritmo, traballo constante e versatilidade ao equipo. Acostumado a xogar cun alto nivel de esixencia, combina un bo despregamento físico con criterio na toma de decisións, sendo un xogador capaz de adaptarse a diferentes situacións e achegar equilibrio ao colectivo.
Deste modo, a súa gran capacidade para competir a un alto ritmo durante os noventa minutos, así como a súa entrega, a súa predisposición ao esforzo e o seu compromiso, dotarán ao cadro dirixido por Carlos de Lerma dun perfil de moito nivel para Segunda Federación.
Nesta nova etapa no seu Compos, Jordan chega co obxectivo de poñer a súa calidade ao servizo do equipo desde o primeiro día. Así, mañá sumarase aos adestramentos para comezar unha ilusionante tempada.
Benvido de volta, Jordan!
