-
Teofilović, de 1,92 metros de altura, chega cedido polo CD Lugo, da Primeira Federación, para aportar potencia, remate e gol
Santiago de Compostela, 25 de agosto de 2026
A SD Compostela 26/27 xa ten ao seu dianteiro referencia: Ognjen Teofilović (Belgrado, 2006) é novo xogador compostelanista. O ariete serbio chega cedido polo Club Deportivo Lugo, conxunto da Primeira Federación, para aportar o seu poderío aéreo, a súa potencia e o seu gol ao ataque do Compos.
Cos seus 1,92 metros de altura, Teofilović é un dianteiro que destaca pola súa presenza física, a súa capacidade para xogar de costas e, especialmente, polo seu perigo dentro da área. Un ‘9’ de referencia que pode ofrecer unha alternativa diferente ao ataque grazas á súa potencia, xogo aéreo e capacidade para protexer o balón ante os defensores.
En todo caso, o seu perfil non se limita unicamente ao xogo físico, xa que posúe unha boa coordinación para a súa altura, capacidade para asociarse cos seus compañeiros e recursos para finalizar con ambas pernas. Ademais, a súa potencia permítelle ser unha ameaza ao espazo.
A pesar da súa mocidade, 19 anos, o novo dianteiro do Compos conta cunha interesante traxectoria formativa nas categorías inferiores do Estrella Roja de Belgrado, un dos clubs máis importantes de Serbia. Na súa etapa xuvenil chegou a conseguir 24 goles en 28 partidos, debutando na UEFA Youth League e sendo internacional sub-19 coa súa selección.
Tras saír do seu país natal, firmou no Lugo, onde o ano pasado xogou 16 encontros, nos que anotou 3 goles. Ademais, nesta pretempada volveu marcou dous goles, nos amigables contra o Celta Fortuna e Deportivo Fabril.
Agora, nesta nova etapa buscará dar un paso adiante no seu crecemento futbolístico da man da SD Compostela. Coas súas grandes condicións e o seu traballo, ten como obxectivo aportar o seu máximo para o bo facer do equipo dirixido por Carlos de Lerma. Para iso, mañá xa se unirá aos adestramentos, nesta recta final da pretempada.
Benvido a Compostela, Teofilović!
