-
A conselleira de Política Social e Igualdade, Fabiola García, destacou a importancia de que un club como o Compos se adhira ao programa do Carné +65
Santiago de Compostela, 30 de setembro do 2026
A conselleira de Política Social e Igualdade, Fabiola García, visitou as instalacións da SD Compostela para poñer en valor o Carné +65, programa da Xunta de Galicia ao que está adherido o noso club. Grazas a esta iniciativa, 164 persoas maiores de 65 anos puidéronse beneficiar dunha bonificación do 20% na Campaña de Abonos “O Camiño do Norte” para esta Tempada 26/27.
Na súa visita, Fabiola García destacou a importancia de que un club de referencia e con tanto arraigo como a SD Compostela participe nesta iniciativa, a través da que se quere fomentar o envellecemento activo.
Neste senso, a conselleira destacou que grazas ao Carné +65 son moitas as persoas maiores que desfrutan de descontos e vantaxes en servizos de saúde e benestar, hostalería, ocio e lecer, produtos ou eventos culturais.
No noso caso, o desconto do 20% aplicouse ao prezo do abono 26/27, nunha campaña que aínda segue aberta para todo aquel que queira apoiar ao noso equipo nesta tempada.
O abono inclúe o acceso aos encontros disputados no Estadio Vero Boquete de San Lázaro, acceso aos partidos de local do Xuvenil A de División de Honra, carné físico gratuíto, reserva de asento e un 10% de desconto en todos os artigos da ComposTenda.
