- As clases comezarán o 12 de setembro e haberá un máximo de 35 alumnos
Santiago de Compostela, 6 de setembro de 2022
O Club Arteal Tenis de Mesa abre a inscrición da súa Escola Deportiva para todos aqueles nenos e nenas da comarca de Compostela con idades comprendidas entre os 6 e os 14 anos. As clases empezarán a partir do próximo 12 de setembro e o número máximo será de 35 alumnos.
A actividade será impartida no local do estadio de Fútbol de San Lázaro e estará dirixida polos adestradores Gerusa Manhani, Humberto (xogador de SuperDivisión) e Ignacio Cabezas.
Ata outubro desenvolveranse xornadas de portas abertas, onde os nenos poderán compartir mesa e gozar cos xogadores profesionais dos equipos de SuperDivisión Masculina, que participarán igualmente nas clases.
O prazo para inscribirse acabará unha vez cubertas as prazas e o horario das clases será de luns a venres, de 17.00 a 20.15 horas, repartidas en varios grupos, cun máximo de 12 alumnos.
A cota mensual é de 20€, con bonos familiares para varios membros da mesma familia. Dada a gran acollida que tivo en pasadas edicións, tamén existirá un grupo de adultos, onde poden participar todo tipo de afeccionados.
Para as inscricións ou recibir máis información habilítase o teléfono de contacto 636478145.
