- A tenda da rúa do Vilar 43, será unha casa para todos os compostelanistas.
Santiago de Compostela, a 4 de Outubro de 2016.
O 4 de outubro de 2016 quedará marcado na historia da SD Compostela como aquel día no que se inaugurou a primeira tenda oficial da entidade. Unha data que rememorará un feito histórico no club da capital de Galicia.
Desde que chegou á presidencia da SD Compostela no 2011, un dos desexos de Antonio Quinteiro era “contar cun punto neurálxico para o club”, un lugar que acada neste sexto ano “grazas á colaboración de Reizentolo”.
A partir de agora, a tenda de Rúa do Vilar será “unha casa para todos os compostelanistas”. Un fogar no que atoparán “toda a roupa de equipo que visten os xogadores da SD e tamén os membros da canteira”.
Todo o merchandising do equipo estará nun córner especial, aínda que Pablo Rodríguez, un dos socios fundadores da empresa galega, quixo recalcar que “máis que un córner, é unha media área”.
Será unha zona especial coa que a entidade compostelana intentará, en palabras do seu director de marketing, Javier Puñal, “crecer e dinamizar”. Este impulso queren logralo, “introducíndonos na canle souvenir, a canle do peregrino, a canle internacional do club”.
Isto será posible grazas á sinerxia “cunha marca galega de recoñecido prestixio e de liña vanguardista”, tal e como a definiu Javier Puñal. Unha mistura que funciona perfectamente na tenda Reizentolo, xa que según o seu fundador, “consideramos que as nosas tendas deberían ter algo máis, elementos dinamizadores que as diferencie e aporten os valores da nosa marca”.
Uns valores que conxugan cun club deportivo como o Compostela, polo que Pablo Rodríguez espera “ir medrando xuntos e que a colaboración dure no tempo”.
Por último, Javier Puñal quixo facer unha mención especial a “mascreativos, pola axuda co deseño da tenda, laucreaciones coa colocación dos vinilos e, evidentemente, a Reizentolo, polo esforzo que fixo polo club”.
A partir de agora, como compostelanistas, a tenda da rúa do Vilar 43 será a nosa segunda casa. Un punto de reunión para todos os nosos seguidores, que día tras días nos apoiades. A historia da SD Compostela chantou un punto máis nela.
